އޭއައި ބޭނުންކޮށްގެން އުފެއްދުންތެރިކަން އިތުރުކުރުމަށް ރާއްޖެއިން މަސައްކަތް ކުރާކަމަށް ރައީސް ޑރ.މުޢިއްޒު ވިދާޅުވެއްޖެއެވެ.
އދ. ގެ "ސަމިޓް އޮފް ދަ ފިއުޗަރ" ގެ އިންޓަރެކްޓިވް ޑައިލޮގްގައި ކޯ-ޗެއާގެ ގޮތުގައި ބައިވެރިވެވަޑައިގެން ވާހަކަފުޅު ދައްކަވަމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވީ އުފެއްދުންތެރިކަން އިތުރުކުރުމަށް އާޓިފިޝަލް އިންޓެލިޖެންސް (އޭއައި) ބޭނުންކުރުމުގެ މަސައްކަތް ރާއްޖެއިން ކުރަމުން އަންނަ ކަމަށެވެ. ޑިޖިޓަލައިޒޭޝަންގައި ގައުމުތަކުގެ މެދުގައި އޮތް ތަފާތުތައް ނައްތާލުމަށް ގޮވާލެއްވި ރައީސް، މިކަމާ ގުޅޭ ތިން ހުށަހެޅުމެއް ހުށަހަޅުއްވައިފިއެވެ.
ރައީސް މުޢިއްޒު ހުށަހެޅުއްވި ކަންތައްތަކުގެ ތެރޭގައި ޑިޖިޓަލް އިޤްތިޞާދުގައި ބައިވެރިވުމަށް ޒުވާނުން ބާރުވެރިކުރުވުމާއި، ޑިޖިޓަލް އިންފްރާސްޓްރަކްޗަރ ޤާއިމުކުރުމާއި، އަދި ޑިޖިޓަލައިޒޭޝަންއާއެކު މީހުންގެ ޙައްޤުތައް ރައްކާތެރިކުރުން ހިމެނެއެވެ. ރާއްޖޭގައި މިހާރުވެސް ނެޝަނަލް ސެންޓަރ ފޮރ އިންފޮމޭޝަން ޓެކްނޮލޮޖީއާއި ނެޝަނަލް ސައިބަރ ސެކިއުރިޓީ އޭޖެންސީ މެދުވެރިކޮށް މި ދާއިރާއިން މަސައްކަތްތަކެއް ކުރަމުންދާ ކަމަށް ރައީސް ފާހަގަކުރެއްވިއެވެ.
ރައީސް މުޢިއްޒު އިތުރަށް ފާހަގަކުރެއްވި ގޮތުގައި، ރާއްޖޭގައި ޑިޖިޓަލް ހުނަރުތަކަށް އިންވެސްޓްކޮށް، ދިވެހިންގެ އީޖާދީ މަސައްކަތްތަކާއި އިޤްތިޞާދު ސިންދަފާތު ކުރުމަށް ހިތްވަރު ދެމުން ގެންދެއެވެ. މީގެ އިތުރުން، ބައިނަލްއަޤްވާމީ މާކެޓްޕްލޭސްތަކާއި ވަޒީފާގެ މާހައުލުގައި ބައިވެރިވުމަށް ފްރީލާންސްކޮށް މަސައްކަތްކުރާ ފަރާތްތަކާއި ކުދި އަދި މެދު ފަންތީގެ ވިޔަފާރިތަކަށް އެހީތެރިކަން ފޯރުކޮށްދެމުންދާ ކަމަށްވެސް ވިދާޅުވިއެވެ.
ޑިޖިޓަލް އިންފްރާސްޓްރަކްޗަރ ގާއިމުކުރުމަށް އިސްކަންދޭ ކަމަށް ވިދާޅުވެ ރައީސް، ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލުކުރުމަށް ޑިޖިޓަލް ޓެކްނޮލޮޖީގެ މުހިންމުކަން ފާހަގަކުރެއްވިއެވެ. މި ގޮތުން ހައި-ސްޕީޑް އިންޓަނެޓް ކަވަރޭޖް ފުޅާކުރުމާއި، އަސާސީ ޚިދުމަތްތައް ޑިޖިޓަލް ކުރުމާއި، އުފެއްދުންތެރިކަން އިތުރުކުރުމަށް އޭއައި ބޭނުންކުރުމަކީ ސަރުކާރުން އިސްކަންދޭ ކަންތައްތަކެއް ކަމުގައި ވިދާޅުވިއެވެ.
އަދި ޑިޖިޓަލައިޒޭޝަންއާއެކު މީހުންގެ ޙައްޤުތައް ރައްކާތެރިކުރުމަށް ފިޔަވަޅުތައް އެޅުމުގެ މުހިންމުކަން ފާހަގަކުރެއްވައި، ހުއްދައާ ނުލައި އެކްސެސްތައް ހޯދުމާއި، އެކައުންޓުތައް ހައިޖެކް ކުރުމާއި ޑޭޓާ ޕްރައިވެސީއާ ގުޅުން ހުރި ކަންބޮޑުވުންތަކަށް ހައްލު ހޯދުމަށް ރާއްޖެއިން މަސައްކަތްކުރަމުންދާ ކަމަށް ރައީސް ވިދާޅުވިއެވެ. މި ގޮތުން ނެޝަނަލް ސައިބަރ ސެކިއުރިޓީ އޭޖެންސީ އުފައްދާފައިވާކަން ވެސް އެމަނިކުފާނު ފާހަގަކުރެއްވިއެވެ.
އދ. ގެ އާންމު މަޖިލީހުގެ 79 ވަނަ ސެޝަންގައި ބައިވެރިވެވަޑައިގަތުމަށް ކުރައްވާ ދަތުރުފުޅުގެ ތެރެއިން ރައީސް މާދަމާ ވަނީ އާންމު މަޖިލީހުގައި ތަޤްރީރުކުރެއްވުމަށް ހަމަޖެހިފައެވެ. މީގެ އިތުރުން މި ދަތުރުފުޅުގައި އދ. ގެ ސަލާމަތީ މަޖިލީހުގައިވެސް ވާހަކަފުޅު ދައްކަވާނެ ކަމަށް ބެލެވެއެވެ. މި ބައްދަލުވުންތަކުގައި ރާއްޖޭގެ ޑިޖިޓަލް ކުރިއެރުމާއި އޭއައި ބޭނުންކޮށްގެން އުފެއްދުންތެރިކަން އިތުރުކުރުމަށް ކުރެވޭ މަސައްކަތްތަކާ ގުޅޭ ގޮތުން އިތުރަށް މަޝްވަރާކުރައްވާނެ ކަމަށް ލަފާކުރެވެއެވެ.
Advertisement
This content is created and paid for by advertisers and does not involve Voice Journalists
