މާލޭގެ މަގުތަކުގައި ޕާކިން ސްލޮޓު ހަދައިގެން ކުއްޔަށް ދޫކުރުން ހުއްޓާލުމަށް މާލެ ސިޓީ ކައުންސިލަށް ޓްރާންސްޕޯޓް މިނިސްޓްރީން އަންގައިފިއެވެ.

ޓްރާންސްޕޯޓް މިނިސްޓްރީން ކުރި އިއުލާނެއްގައި ފާހަގަކުރެއްވި ގޮތުގައި، މާލޭގެ މަގުތަކުގައި އާންމު ބޭނުމަށް އޮންނަ ޖާގަ މަދުވެ، މަގުތައް ބޭނުންކުރުމުގައި ދަތިތަކާ ކުރިމަތިލާންޖެހިފައިވެއެވެ. އަދި އެކިއެކި ޒަރޫރީ ބޭނުންތަކަށް މާލެއަށް އަންނަ ފަރާތްތަކަށް ވަގުތީގޮތުން ޕާކުކުރާނެ ތަނެއް ހޯދުމަށްވެސް ދަތިވެފައިވާ ކަމަށް ބަޔާންކުރައްވާފައިވެއެވެ.

މިނިސްޓްރީން އިތުރަށް ވިދާޅުވެފައިވަނީ، މަގުތަކުގައި ހުރި އާންމު ޖާގަތައް ހުރިހާ ރައްޔިތުންނަށް ހަމަހަމަކަމާއެކު ބޭނުންކުރެވޭނެ ގޮތް ހެދުމަށްޓަކައި، މިއަދުން ފެށިގެން އެއްވެސް ސަރަހައްދަކުން ޕާކިން ސްލޮޓް ކުއްޔަށް ނުދިނުމަށް ކައުންސިލަށް އަންގާފައިވާ ކަމަށެވެ. މީގެ އިތުރުން، މިހާތަނަށް ކުއްޔަށް ދޫކޮށްފައިވާ ސްލޮޓްތަކުގެ މުއްދަތު ހަމަވުމުން، އެ ޖާގަތައްވެސް އަލުން ކުއްޔަށް ދޫނުކުރުމަށް އަންގާފައިވާކަން ފާހަގަކޮށްފައިވެއެވެ.

Advertisement

ކުރިން މާލޭ ސިޓީ ކައުންސިލުން ވަނީ މާލޭގެ މަގުތަކާއި ބައެއް ހުސްބިންތަކުން 450 ޕާކިން ޖާގަ ހަދައި ކުއްޔަށް ދޫކުރުމަށް ނިންމާފައެވެ. މި ޖާގަތަކަށް 1000 އާ ގާތްކުރާ އަދަދަކަށް މީހުން ކުރިމަތިލުމާ ގުޅިގެން، ކައުންސިލުން ވަނީ ގުރުއަތުލައިގެން އެ ސްލޮޓުތައް ދޫކޮށްފައެވެ. ނަމަވެސް، މިހާރު ޓްރާންސްޕޯޓް މިނިސްޓްރީގެ މި އެންގުމާއެކު، މި އުސޫލަށް ބަދަލު އަންނާނެއެވެ.