ސްމާޓް މީޓަރު ތަޢާރަފުވުމުން ކަރަންޓު އިޤްތިޞާދުކުރުމަށް މަގުފަހިވެގެންދާނެ ކަމަށް ފެނަކައިން ބުނެފިއެވެ. 

އެސްއެސްޓީވީގެ ބާރު 4 ޕްރޮގްރާމްގައި ފެނަކަ ކޯޕަރޭޝަނުގެ ޗީފް ޓެކްނިކަލް އޮފިސަރު އަބްދުﷲ ނާޝިތު ވިދާޅުވީ، ފެނަކަ ކޯޕަރޭޝަނުން ތަޢާރަފުކުރާ ސްމާޓް މީޓަރުގެ ސަބަބުން ކަރަންޓު އިޤްތިޞާދުކުރުމަށް ވަރަށްބޮޑަށް ފަސޭހަވާނެ ކަމަށާއި، ހުރިހާ ރަށެއްގައި މި ޕްރޮޖެކްޓް ހިންގަން ފެށުމުން، ސްމާޓް މީޓަރު މެދުވެރިކޮށް ކަސްޓަމަރުންނަށް ކަރަންޓު ޚަރަދު ކުޑަކުރެވޭނެ ކަމަށެވެ.

ނާޝިތު އިތުރަށް ވިދާޅުވީ، ކަމާ ގުޅުންހުރި އިދާރާތަކާ މަޝްވަރާކޮށް "ޓައިމް އޮފް ޔޫސް ޓެރިފް" ބޭނުންކުރުމަށް ގަސްތުކުރާ ކަމަށެވެ. މި ޓެރިފްގެ ދަށުން، ސްމާޓް މީޓަރުން މިނެޓުން މިނެޓަށް، ސިކުންތުން ސިކުންތަށް ކަރަންޓު ބޭނުންކުރެވޭ މިންވަރު ދެނެގަނެވޭނެއެވެ. އަދި ކޮންމެ ގަޑިއިރަކަށް ބިލްކުރެވޭނެ ކަމަށް އޭނާ ވިދާޅުވިއެވެ.

Advertisement

ނާޝިތު ފާހަގަކުރެއްވި ގޮތުގައި، ޕީކް ގަޑިތަކުގައި (މެންދުރު 10 އާއި 2 އާ ދެމެދު) ކަރަންޓު އުފެއްދުމަށް ބޮޑު ޚަރަދެއް ކުރަންޖެހެއެވެ. އެހެންކަމުން، ޕީކް ނޫން ގަޑިތަކުގައި ކަރަންޓު ބޭނުންކުރުމަށް ބާރުއަޅައި، ކަރަންޓު ބޭނުންކުރާ މިންވަރު އެއްހަމައެއްގައި ހިފެހެއްޓުމަށް ބޭނުންވާ ކަމަށް އޭނާ ވިދާޅުވިއެވެ. މިގޮތަށް ޢަމަލުކުރުމުން ކަރަންޓު އުފެއްދުމަށް ކުރާ ޚަރަދު ކުޑަވެ، އޭގެ މަންފާ ކަރަންޓު ބޭނުންކުރާ ފަރާތްތަކަށް ލިބޭނެއެވެ.

އަދި ކަރަންޓު އިޤްތިޞާދުކޮށް ބޭނުންކުރެވޭނެ ގޮތްތަކުގެ ހޭލުންތެރިކަން އިތުރުކުރުމުގެ ޕްރޮގްރާމްތަކެއްވެސް ރާވާފައިވާ ކަމަށް ނާޝިތު ވިދާޅުވިއެވެ.