އިޒްރޭލުން ލެބަނޮނާ ދެކޮޅަށް ހަމަލާތައް ހަރުކަށިކުރުމާއެކު އެ ގައުމުގައި ކުއްލި ނުރައްކަލުގެ ހާލަތު އިޢުލާންކޮށްފިއެވެ.

އިޒްރޭލުގެ ސަރުކާރުން ވަނީ ސެޕްޓެމްބަރު 30 އާ ހަމައަށް ކުއްލި ނުރައްކަލުގެ ހާލަތު އިޢުލާންކޮށްފައެވެ. މިއީ އިޒްރޭލުން ލެބަނޮނަށް ދެމުންދާ ހަމަލާތައް އިތުރުވަމުން ދިއުމާއި، ހިޒްބުﷲއިން އިޒްރޭލަށް ރޮކެޓް ހަމަލާތައް އިތުރުކުރާނެކަމަށް ލަފާކުރެވޭތީ އެޅި ފިޔަވަޅެކެވެ.

އިޒްރޭލީ ނޫސް "ޔެދިއޮތް އަހަރޮނޮތް" އިން ބުނާ ގޮތުގައި، އިޒްރޭލުގެ ވަޒީރުން ވަނީ މުޅި ގައުމުގައި "ޚާއްޞަ ހޯމް ފްރަންޓް ހާލަތެއް" އިޢުލާންކުރުމަށް ވޯޓުދީފައެވެ. މި ވޯޓުލުން ބޭއްވުނީ ފޯނުން ކަމަށާއި، މިއީ ދިފާއީ ވަޒީރު ޔޯވް ގަލަންޓްގެ ހުށަހެޅުމެއް ކަމަށް އެ ނޫހުން ބުނެފައިވެއެވެ.

Advertisement

މި އިޢުލާނުގެ ދަށުން، އިޒްރޭލުގެ ސިފައިންނަށް ޢާންމުންނަށް އިރުޝާދު ދިނުމުގެ ބާރު ލިބިގެންދާނެއެވެ. މީގެ ތެރޭގައި އެއްވުންތައް މަނާކުރުމާއި، ތަޢުލީމީ ހަރަކާތްތައް ކޮންޓްރޯލްކުރުމާއި، އަދި "ފުރާނަ ސަލާމަތްކުރުމަށް ބޭނުންވާ އިތުރު އިރުޝާދުތައް" ދިނުން ހިމެނެއެވެ.

މި އިޢުލާނު ކުރެވުނީ ހިޒްބުﷲގެ އިސް ކޮމާންޑަރެއް ކަމަށްވާ ޢަލީ ކަރަކީ އަވަހާރަކޮށްލުމަށް އިޒްރޭލުގެ ސިފައިން ދިން ހަމަލާއަކާ ގުޅިގެންނެވެ. އިޒްރޭލުގެ އާމީ ރޭޑިއޯއިން ބުނާ ގޮތުގައި، ބައިރޫތުގެ ދެކުނު ފަރާތުގެ ބައެއް ސަރަޙައްދުތަކަށް ދެވުނު ވައިގެ ހަމަލާތަކުގެ އަމާޒަކީ ކަރަކީއެވެ. ނަމަވެސް އޭނާގެ ހާލަތާ ގުޅޭ އިތުރު މަޢުލޫމާތެއް ލިބިފައެއް ނުވެއެވެ.

ލެބަނަންގެ ޞިއްޙީ އިދާރާތަކުން ބުނާ ގޮތުގައި، ހޯމަ ދުވަހުގެ ފަތިހުން ފެށިގެން އިޒްރޭލުން ދިން ހަމަލާތަކުގައި މަދުވެގެން 274 މީހުން ޝަހީދުވެފައިވެއެވެ. މީގެ ތެރޭގައި 21 ކުޑަކުދިން ހިމެނެއެވެ. އަދި 1,024 މީހުންނަށް އަނިޔާވެފައިވާ ކަމަށް ވެސް އެ އިދާރާތަކުން ބުނެފައިވެއެވެ. މި ހަމަލާތަކާ ގުޅިގެން އެތައް ހާސް މީހުން ވަނީ އެމީހުންގެ ގޭގެ ދޫކޮށް ފިލައިގެން ގޮސްފައެވެ.

ބައިނަލްއަޤްވާމީ މުޖުތަމަޢުން ވަނީ މި ހަމަލާތަކާމެދު ކަންބޮޑުވުން ފާޅުކޮށް، މިދެގައުމުގެ ހަނގުރާމަ ސަރަޙައްދީ ފެންވަރަކަށް ފުޅާވެދާނެކަމުގެ އިންޒާރު ދީފައެވެ. ފާއިތުވި އޮކްޓޯބަރު 7 ން ފެށިގެން އިޒްރޭލުން ޣައްޒާއަށް ދެމުންދާ ހަމަލާތަކުގައި މިހާތަނަށް 41,400 އަށްވުރެ ގިނަ މީހުން ޝަހީދުވެފައިވެއެވެ. މީގެ ތެރޭގައި ގިނައީ އަންހެނުންނާއި ކުޑަކުދިންނެވެ.