ރައްޓެހިންނާ އެކު ދަތުރުގޮސް އުޅެނިކޮން ގެއްލުނު މ. އަސަރީހަނދާން، އުމުރުން 43 އަހަރުގެ ތަސްލީމް މުހައްމަދު ގެއްލިގެން އިންޓަޕޯލް ޔެލޯ ނޯޓިސް އަދިވެސް ނެރެފައިވާ ކަމަށް ފުލުހުން މިއަދު ބުނެފިއެވެ.

ކ. ހުވަފެންފުށި ދެކުނުން ހިއްކާފައި އޮންނަ ފަސްގަނޑަށް ދަތުރުގޮސް އުޅެނިކޮށް ތަސްލީމް ގެއްލުނީ މިދިޔަ އޯގަސްޓް 30 ވަނަ ދުވަހުގެ ހެނދުނު 10-11 އާ ދެމެދުގެ ވަގުތެއްގައެވެ. އޭނާ އެ ފަސްގަނޑަށް ދިޔައީ އުފަންދުވަހުގެ ޕާޓީއަކާއި އެންގޭޖްމަންޓް ޕާޓީއަކަށް ބެކްޑްރޮޕް އަދި ލައިޓިންގގެ މަސައްކަތް ކުރުމަށެވެ. މި ދަތުރުގައި 25 މީހުންނާއި ދެ ކުޑަކުދިން ބައިވެރިވިއެވެ.

އޭނާ ހޯދުމުގެ މަސައްކަތްކުރާތާ މަހަކަށްވުރެ ގިނަ ދުވަސްވެފައިވާއިރު އޭނާގެ ހިލަމެއް ވެސް ނުވާ ކަމަށް ފުލުހުން ވަނީ ބުނެފައެވެ.

Advertisement

އޭގެ ފަހުން ފުލުހުން މިދިޔަ މަހު ވަނީ ތަސްލީމް ހޯދަން އިންޓަޕޯލް ޔެލޯ ނޯޓިސްއަށް އެދޭނެ ކަމަށް ބުނެފައެވެ. މި ނޯޓިސްއަކީ ގެއްލިގެން ހޯދާ މީހުންގެ އޮޕަރޭޝަންތައް ފުޅާކުރުމުގެ ގޮތުން ނެރެވޭ ނޯޓިސްއެކެވެ.

ނަމަވެސް އިންޓަޕޯލްގެ ރަސްމީ ވެބްސައިޓުގައި އެ ނޯޓިސް ފެންނަން ނެތުމުން ބައެއް މީހުން ވަނީ ކަންބޮޑުވުން ފާޅުކޮށްފައެވެ.

އެކަމާއި ގުޅިގެން ފުލުހުން މިއަދު މީޑިއާތަކަށް ހިއްސާކުރި މެސެޖެއްގައި ބުނީ، ތަސްލީމު ހޯދަން އިންޓަޕޯލްއިން ޔެލޯ ނޯޓިސް މިދިޔަ މަހު 12 ވަނަ ދުވަހު ޕަބްލިޝްކޮށްފައިވާ ކަމަށެވެ.

އަދި އިންޓަޕޯލް ނޯޓިސްއަކީ ހުރިހާ މެންބަރު ގައުމުތަކަށް ވެސް ފެންނަ ގޮތަށް ޕަބްލިޝްކުރާ ނޯޓިހެއްކަމަށާ، ބައެއް ނޯޓިސްތަކަކީ އާންމުންނަށް ފެންނަ ގޮތަށް އިންޓަޕޯލްގެ ވެބްސައިޓުގައި ޕަބްލިޝްކުރާ ނޯޓިހެއް ނޫން ކަމަށެވެ.