މާލެސިޓީ ކައުންސިލްގައި މޭޔަރު އާދަމް އާޒިމްގެ މަސައްކަތްތައް ކުރިއަށްގެންދިއުމަށް ފަސޭހަކުރުމަށް 15 ކޮންސަލްޓަންޓުން ތިއްބަވާކަމަށް މޭޔަރު މިއަދު ވިދާޅުވެއްޖެއެވެ.

އެމްޑީޕީން މިއަދު ފެށި "ލާމަރުކަޒީ ގުޅުން" ޖަލްސާގައި ވާހަކަދައްކަވަމުން މޭޔަރު އާދަމް އާޒިމް ވިދާޅުވީ، މާލެސިޓީ ކައުންސިލްގެ މަސައްކަތްތައް ކުރިއަށްގެންދިއުމަށް އެމަނކުފާނަށް މިއަދު ދަތިފުޅުވާ ހަމަ އެއްވެސް ކަމެއް ނެތްކަމަށެވެ.

ކޮންސަލްޓަންޓުން ނަގަން ބޭނުންވީމައި އެކަންވެސް އެމަގުން ކުރިއަށްގެންދެވޭކަން ފާހަގަކުރައްވަމުން މޭޔަރު ވިދާޅުވީ، އެމަނިކުފާނުގެ މަސައްކަތްޕުޅުތަކަށް ފަސޭހައަކަށް މިހާރުވެސް 15 ކޮންސަލްޓަންޓުން ނުވަތަ ލަފާދޭ ފަންނީމީހުންގެ ގޮތުގައި 15 މީހަކު ތިއްބަވާކަމަށެވެ. އޭގެތެރެއިން، 14 މެމްބަރުންނަކީ މޭޔަރު އަާދަމް އާޒިމަށް ނިސްބަތްވާ އެމްޑީޕީއަށް ނިސްބަތްވާ ކޮންސަލްޓަންޓުންކަމަށް މޭޔަރު ވިދާޅުވިއެވެ.

މޭޔަރު ވިދާޅުވީ މާލެސިޓީން މާލޭގެ ރައްޔިތުންނަށް ކޮށްދެންޖެހޭ ކަންކަން، މިނިސްޓްރީތަކުގެ ބޭފުޅުންނާއި ރަހުމަތްތެރިކަން ބަދަހިކޮށްގެން ކުރިއަށްގެންދެވޭކަމަށެވެ. ބަލަނީ ކޮންމެ ދުވަހަކީވެސް އައު ދުވަހެއް ކަމަށާއި، ކޮންމެފަދަ ކަމެއްވެސް ކުރިމަތިވެދާނޭކަމަށް ވިސްނަވާކަމަށް މޭޔަރު ވިދާޅުވިއެވެ. 

މާލެސިޓީގެ މޭޔަރުކަމުގެ މަގާމު އާދަމް އާޒިމް ކާމިޔާބުކުރައްވާފައިވަނީ، މިއަހަރުގެ ޖެނުއަރީމަހު ބޭއްވި އިންތިހާބުގައި ސަރުކާރުގެ ފަރާތުން ވާދަކުރެއްވި ކެނޑިޑޭޓް އާޒިމާ ޝަކޫރާ ވާދަކޮށެވެ. އެމްޑީޕީގެ ޓިކެޓްގައި ހޮވުނު ނަމަވެސް ސަރުކާރާ ގުޅިގެން މަސައްކަތްކުރަން ދަތިކަމެއް ނެތްކަމަށް އާޒިމް ވަނީ މީގެ ކުރިން ވިދާޅުވެފައެވެ. މިގޮތުން ސަރުކާރުގެ މިނިސްޓަރުންގެ ފަރާތުން އެއްބާރުލުން ލިބިވަޑައިގަންނަވާކަމަށް މޭޔަރު ވަނީ މީގެ ކުރިން ފާހަގަކުރައްވާފައެވެ.

މާލެސިޓީ ކައުންސިލުގައި އެމްޑީޕީއަށް ނިސްބަތްވާ 14 ކޮންސަލްޓަންޓުން ތިއްބަވާކަމަށް މޭޔަރު ވިދާޅުވިއިރު، އެމްޑީޕީއަށް ނިސްބަތްވާ ފަރާތްތައް ސަރުކާގެ ބާރު އޮންނަ މުއައްސަސާތަކުން ވަކިކުރާކަމުގެ ތުހުމަތު އެމްޑީޕީން އަންނަނީ ކުރަމުންނެވެ.