މާލޭ ސަރަހައްދުގައި ޑްރަގް ނެޓްވޯކެއް ހިންގަމުން ދިޔަ ހަތަރު މީހަކު އުމުރަށް ޖަލަށް ލުމަށް ހުކުމްކޮށްފި އެވެ.

މި މައްސަލައިގައި އުމުރަށް ޖަލަށްލުމަށް ހުކުމްކޮށްފައިވަނީ ގދ. ތިނަދޫ، ތަންގަލް، ހަސަން ލޫތު އާއި، ހުޅުމާލެ، ފްލެޓް 01-ޖީ-45، ހަސަން ރަޝީދާއި، ތ. ތިމަރަފުށި، ވައިޓްރޯސް، އިސްމާއިލް ޝަރީފާއި، މއ. ހަސްލަތު، ޝާނިޔާ އިބްރާހިމް އެވެ.

އޮކްޓޯބަރ މަހުގެ 16 ވަނަ ދުވަހު ކްރިމިނަލް ކޯޓުން ކުރި ހުކުމްގައި މި ހަތަރު މީހުންނަށް 25 އަހަރުގެ ޖަލު ހުކުމް އިއްވައި، ޖޫރިމަނާވެސް ކޮށްފައިވެއެވެ.

އެގޮތުން، ހަސަން ލޫތު ދެ މިލިއަން ރުފިޔާއިން، ހަސަން ރަޝީދު އެއް މިލިއަން ރުފިޔާއިން އަދި އިސްމާއީލް ޝަރީފާއި ޝާނިޔާ އިބްރާހިމް 500،000 ރުފިޔާ އިން ޖޫރިމަނާކޮށްފައި ވެއެވެ.

މި މީހުންގެ މައްޗަށް ދައުލަތުން ވަނީ ޑައިމޯފިން ޓްރެފިކްކުރުމުގެ ދައުވާއާއި މަނީ ލޯންޑަރިންގެ ދައުވާވެސް ކޮށްފަ އެވެ.

ފުލުހުން ބުނެފައިވާގޮތުގައި މި ހަތަރު މީހުން ހައްޔަރުކޮށްފައިވަނީ ދިވެހި ރާއްޖެއަށް މަސްތުވާތަކެތި އެތެރެކޮށް، އެތަކެތި ބޭނުންކޮށް، ގެންގުޅެ އަދި ޓްރެފިކް ކުރާކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން 2021 ޖަނަވަރީ 12 ވަނަ ދުވަހު ހިންގި އޮޕަރޭޝަނުގައެވެ.

އެގޮތުން، މިމީހުންގެ ތެރެއިން ލޫތު ހައްޔަރުކޮށްފައިވަނީ މާލެ، ގ. ނީ އިންނެވެ. ފުލުހުން އެތަން ބަލައި ފާސްކުރުމުގެ ތެރެއިން 33.196 ގްރާމްގެ ޑައިމޯފިން އާއި އޭނާ ދިރިއުޅޭ ކޮޓަރިން 1،466،000 ރުފިޔާ ހޯދާފައިވެ އެވެ.

މައްސަލައިގައި ހިމެނޭ ހަސަން ރަޝީދު މއ. ހަނީސަކްލް ހައްޔަރުކުރިއިރު އޭނާ ބަލައި ފާސްކުރުމުގެ ތެރެއިން ވާތް ފަރާތު ޖީބުން 14.6735 ގްރާމްގެ ޑައިމޯފިން ހޯދާފައިވާ ކަމަށް ފުލުހުން މައުލޫމާތު ދީފައިވެއެވެ.

މީގެ އިތުރުން، އިސްމާއިލް ޝަރީފާއި ޝާނިޔާ އިބްރާހިމް މ. ރޭއަލިވާގޭގައި ހިންގާ "ރޭއަލި" ގެސްޓްހައުސްގެ ތެރެއިން ހައްޔަރުކުރި އިރު، ގެސްޓްހައުސްގައި އެމީހުން ތިބި 402 ނަންބަރު ކޮޓަރި ތެރެއިން 6.5882 ގްރާމް ޑައިމޯފިންއާއި، 76،675 ރުފިޔާ ފުލުހުން ހޯދާފައިވެ އެވެ.

ބަލައި ފާސްކުރުމުގެ ތެރޭގައި ލޫތުގެ ކޮޓަރިން ފެނުނު 1.4 މިލިއަނަށްވުރެ ގިނަ ރުފިޔާއާއި، ގެސްޓްހައުސް ތެރެއިން ފެނުނު 76،675 ރުފިޔާއަކީ ކުށްކޮށްގެން ހޯދި ފައިސާ ކަމުގައިވެސް އިއްޔެ ވަނީ ކޯޓުން ކަނޑައަޅާފައެވެ. އަދި އެފައިސާ ދައުލަތަށް ނެގުމަށް ވަނީ ހުކުމް ކޮށްފައެޗެ. މިފަދައިން ކޯޓުން ނިންމީ އެ ފައުސާ ލިބިފައިވަނީ ކިހިނެތް ސުވާލުކުރުމުން އެ ފައިސާ ހޯދި ގޮތް އެ މީހުން ބުނެދީފައި ނުވާތީ ކަމަށް ހުކުމްގައިވެ އެވެ.

މި މައްސަލައިގެ ފުލުހުންގެ ތަހުގީގު ނިންމައި ދައުވާކުރުމަށް ޕްރޮސިކިއުޓަރ ޖެނެރަލްގެ އޮފީހަށް ފޮނުވާފައިވަނީ 2021 މާރިޗު 10 ވަނަ ދުވަހުއެވެ.