ވަޒީފާގެ މާހައުލުގައި ވަޒީފާ ދިން ފަރާތުގެ އިހުމާލުން މުވައްޒަފެއްގެ ފުރާނަ ގެއްލިއްޖެ ނަމަ، 1.4 މިލިއަނަށް ވުރެ ގިނަ ރުފިޔާގެ ބޮޑު ބަދަލެއް ވާރިސުންނަށް ދޭން ޖެހޭ ގޮތަށް ލޭބާ ރިލޭޝަންސް އޮތޯރިޓީން ގަވާއިދެއް ހަދައިފި އެވެ.

މިދިޔަ ބުދަ ދުވަހު އަމަލުކުރަން ފެށި "މަސައްކަތުގެ މާހައުލުގެ ސަލާމަތާއި ސިއްހީ ރައްކާތެރިކަމުގެ ގަވާއިދު"ގައި ވާގޮތުން މަސައްކަތުގެ މާހައުލުގައި ނުވަތަ މަސައްކަތުގެ ސަބަބުން މީހަކަށް އަނިޔާއެއްވެ، ވަގުތީ ނުވަތަ ދާއިމީ ނުކުޅެދުންތެރިކަމެއް މެދުވެރިވެއްޖެނަމަ، އަދި މަސައްކަތްތެރިއެއްގެ ފުރާނަ ހިނގައްޖެނަމަ، ޚަރަދުތަކާއި ގެއްލުމުގެ ބަދަލު އެ މީހަކަށް ނުވަތަ އެ މީހެއްގެ ވާރިސުންނަށް ދޭންޖެހޭނެ ކަމަށެވެ.

އެގޮތުން މަސައްކަތުގެ މާހައުލުގައި އަނިޔާއެއް ލިބިއްޖެނަމަ، ލިބުނު އަނިޔާއަށް ބޭސްފަރުވާގެ ހުރިހާ ހަރަދަކާއި، ބޭސްފަރުވާ ކުރަން ޖެހުމުން މަސައްކަތަށް ނުނިކުމެވޭ ދުވަސްތަކުގެ އުޖޫރައާއި، ލިބުނު އަނިޔާގެ ސަބަބުން މެދުވެރިވި ވަގުތީ ނުވަތަ ދާއިމީ ނުކުޅެދުންތެރިކަމަށް ލިބޭ ގެއްލުމުގެ ބަދަލުގެ އިތުރުން އެ ލިބުނު އަނިޔާގެ ސަބަބުން ފުރާ ހިނގައްޖެ ނަމަ، ގެއްލުމުގެ ބަދަލުދޭންޖެހޭ ގޮތަށް ވަނީ ހިމަނާފައެވެ. 

Advertisement

އެގޮތުން، ދާއިމީ ނުކުޅެދުންތެރިކަމެއް ދިމާވާ މަސައްކަތްތެރިއަކަށް ގެއްލުމުގެ ބަދަލު މަދުވެގެން 10 އަހަރަށް ނަގައިދޭން ޖެހެ އެވެ. އަދި މިފަދަ ހާލަތެއް ދިމާވާ މަސައްކަތްތެރިއަކަށް ގެއްލުމުގެ ބަދަލެއްގެ ގޮތުގައި މަދުވެގެން އެއް މިލިއަން އަދި އެންމެ ގިނަވެގެން 19 މިލިއަން ރުފިޔާ ދޭންޖެހޭނެއެވެ. ބަދަލު ދޭންޖެހޭ އަގު ކަނޑައެޅުމުގައި މީހާގެ އުމުރާއި ނުކުޅެދުންތެރިކަމުގެ ނިސްބަތާއި އަދިވެސް އެހެން ބައެއް ކަންކަމަށް ބަލަން ޖެހެއެވެ.

މީގެ އިތުރުން، މަސައްކަތް ހަވާލުކުރި ފަރާތުގެ އިހުމާލުން މުވައްޒަފު މަރުވެއްޖެ ނަމަ، އިހުމާލު އޮތް މިންވަރާއި މަސައްކަތްތެރިޔާގެ އުމުރާއި އޭނާގެ އުޖޫރައަށް ބަލައި، ބަދަލު ދިނުމަށް ވަނީ ހިމަނާފައެވެ. އެގޮތުން ބަދަލު ނަގައިދެވޭނެ އެންމެ ކުޑަ އަދަދަކީ 1.46 މިލިއަން ކަމަށް ވާއިރު އެންމެ ބޮޑު އަދަދަކީ 15.4 މިލިއަން ކަމަށް އެ ގަވާއިދުގައިވެ އެވެ.

އަދި މަސައްކަތް ހަވާލުކުރި ފަރާތުގެ އިހުމާލަކާ ނުލައި ދިމާވި އެކްސިޑެންޓެއްގެ ސަބަބުން ނުވަތަ ހާދިސާއެއްގެ ސަބަބުން ފުރާނަ ހިނގައްޖެ ނަމަ، ގެއްލުމުގެ ބަދަލެއްގެ ގޮތުގައި 50،000ރ. ވާރިސުންނަށް ދޭން ޖެހޭނެ އެވެ.