މާލެއަށް ކުރިމަތިވެފައިވާ ބުޅަލުގެ މައްސަލަ ކުރިން ހައްލުނުކުރެވުނީ އެމްޑީޕީގެ ވެރިކަމުގައި ބިން ހަމަޖައްސައިނުދިނުމުންކަމަށް މާލެސިޓީގެ މޭޔަރުގެ ނައިބު އަހުމަދު ނަރީޝް ވިދާޅުވެއްޖެއެވެ.

ނަރީޝްގެ ފޭސްބުކް އެކައުންޓްގައި މިއަދު ކުރެއްވި ޕޯސްޓެއްގައި ވިދާޅުވީ މާލެއަށް ކުރިމަތިވެފައިވާ ބުޅަލުގެ މައްސަލައިގެ ވާހަކައަކީ ސަރުކާރުތަކުން ދައްކަމުންއައި ހަމައެކަނި ވާހަކަތަކެއް ކަމަށެވެ. ނަރީޝް ވިދާޅުވީ ބުޅަލުގެ މައްސަލައަށް ދާއިމީ ހައްލެއް ގެނައުމަށް މަސައްކަތް ފެށުނީ، މާލެސިޓީ މޭޔަރުގެ މަޤާމުގައި، މިހާރުގެ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ހުންނަވައި ފެއްޓެވި މަސައްކަތްތަކުން ކަމަށެވެ.

ނަރީޝް ވިދާޅުވީ ކައުންސިލްގައި ރައީސް މުއިއްޒު ހުންނަވައި ބުޅަލުގެ މައްސަލައަށް ދާއިމީ ހައްލެއް ހޯއްދެވުމަށް ކުރައްވަމުން އައި މަސައްކަތްޕުޅުތައް ހުއްޓުމަކަށް އައީ އޭރުއޮތް އެމްޑީޕީ ސަރުކާރުން އެކަމަށް ދޭންޖެހޭ ބިން ހަމަޖައްސައި ނުދީ ހިފެހެއްޓުމުން ކަމަށެވެ.

ރައީސް ކަމށް އިންތިހާބުވުމަށްފަހު ފުރަތަމަ އަހަރުގެ ތެރޭގައި މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ އިން ކުރިޔަށް ގެންދިޔަ މަސައްކަތުގެ ތެރެއިން ކެޓް ޝެލްޓަރ ބިނާކުރުމުގެ މަސައްކަތް ސަރުކާރުން އެދުނު ގޮތަށް ކޮށްދިނީ ސިޓީ ކައުންސިލުން ކަމަށް ނަރީޝް ފާހަގަކުރެއްވިއެވެ.

މާލޭގެ މޭޔަރު އާދަމް އާޒިމް ވަނީ ހުޅުމާލޭގައި އަޅާ ކެޓް ޝެލްޓާއަށް އަންނަ މަހުގެ ތެރޭގައި ބުޅާތައް ގެންދެވޭނޭކަމަށް ވިދާޅުވެފައެވެ. 

ހުޅުމާލޭގައި ކެޓްޝެލްޓާ ގާއިމްކުރުމުގެ އަމަލީ މަސައްކަތް ފަށާފައިވަނީ މިއަހަރުގެ މާޗްމަހުގެ ތެރޭގައެވެ. މި ފެސިލިޓީ ހެދުމަށް އެޗްޑީސީން މާލެ ސިޓީ ކައުންސިލަށް ހުޅުމާލެ ދެވަނަ ފިޔަވަހިން 5،000 އަކަފޫޓުގެ ބިމެއް ދީފައިވާއިރު، ހުޅުމާލެ ފަރުކޮޅުފުށި ސަރަހައްދުގައި ބިނާ ކުރާ މި ފެސިލިޓީގެ މަސައްކަތް އެއްކޮށް ނިމޭއިރު އެކި ވައްތަރުގެ ޕެޓް ކެއާ ޕެސިލިޓީއެއް ވެސް އެތަނުގައި ހަދާނެ ކަމަށް މާލެ ސިޓީ ކައުންސިލް އިން މީގެ ކުރިން ވަނީ ބުނެފައެވެ.

މީގެ ކުރިން ރައީސް ޑރ.މުއިއްޒު މާލެ ސިޓީގެ މޭޔަރަކަށް ހުންނެވި އިރު، މާލެ ތެރޭގައި އުޅޭ 1،000 ބުޅާ ނިއުޓާ ކުރުމަށްފަހު ފަރުވާދެވޭ ގޮތަށް ބެލެހެއްޓޭ ވަރުގެ ފެސިލިޓީއެއް އެޅުމަށް ނިންމެވިިއިރު، ވެރިކަމާއި ހަވާލުވެވަޑައިގެން، ގްރޭޓާރ މާލެ ސަރަހައްދުގައި ބުޅާ ގިނަވާ މައްސަލަ ހައްލު ކުރަން ކ.ފަރުކޮޅުފުށީގައި ޕެޓް ކެއާ ފެސިލިޓީއެއް ޤާއިމު ކުރަން ނިންމަވާފައިވާކަމަށް އިއުލާން ކުރީ މިއަހަރުގެ ޖެނުއަރީ މަހުގެ 22 ވަނަ ދުވަހުއެވެ.