ދައުލަތުގެ ހިސާބުތައް ބެލެހެއްޓުމުގައި މިދިޔަ ސަރުކާރުން ބޮޑެތި ގޯސްތަކެއް ހަދާފައި ހުރިކަން ފާހަގަކުރެވިފައިވާކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.

ސަރުކާރުގެ ހަރަދުތައް އާއްމު ނުކުރާ މައްސަލާއާ ގުޅޭގޮތުން ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފިނޭންސް މިނިސްޓަރު ވިދާޅުވީ، ހަރަދުތައް ރެކޯޑް ކުރުމުގައި މިދިޔަ ސަރުކާރުން ވަރަށްބޮޑަށް އިހުމާލުވެފައިވާކަން ފާހަގަކުރެވިފައިވާކަމަށެވެ. މިގޮތުން ހަރަދުކުރި 2 ބިލިއަނަށްވުރެ ގިނަ ރުފިޔާ، ހަމަޖެހިފައިވާ އުސޫލުން ކުރެވުނު މުއާމަލާތްތަކުގައި ނުހިމަނައި ހުރިކަން މިނިސްޓަރު ވިދާޅުވިއެވެ.

މާލީ ވަޒީރު ވިދާޅުވީ މިކަން ހިނގާފައިވާގޮތް ބެލުމަށް އޮޑިޓަރ ޖެނެރަލް އަށް ހުށަހަޅުއްވާފައިވާކަމަށެވެ. އަދި އޮޑިޓަރ ޖެނެރަލްގެ އޮފީހުން މިހާރު މި މައްސަލަ ބައްލަވަމުން ގެންދަވާކަން ޒަމީރު ވިދާޅުވިއެވެ. އަދި މިކަމުގެ ރިޕޯޓް ތައްޔާރުކުރުމުގެ މަސައްކަތް އޮޑިޓް އޮފީހުން ފަށާފައިވާކަންވެސް މިނިސްޓަރު ވަނީ ފާހަގަކުރައްވާފައެވެ.

މިކަމާ ގުޅޭގޮތުން ވާހަކަދައްކަވަމުން ބަންޑާރަ ނައިބު އަހުމަދު އުޝާމް ވިދާޅުވީ، ހަރަދު ކުރަން ޖެހެނީ ރައްޔިތުން މަޖިލީހުން ފާސްކުރާ ބަޖެޓްގެ ތެރެއިން ކަމަށާއި، މާލިއްޔަތު ގަވައިދާ ހިލާފަށް 2 ބިލިއަނަށްވުރެ ގިނަ ރުފިޔާ ހޭދަކޮށްފައިވާކަމަށެވެ.

އުޝާމް ވިދާޅުވީ 2020 އިން ފެށިގެން 2023 ވަނަ އަހަރާއި ހަމައަށް ބަޖެޓް ހުށަހެޅިއިރު، ކަންތައްތައް ކޮށްފައި އޮތީ މިފަދައިން ކަމަށާއި، އެކަމާއި ގުޅިގެން އޭރުގެ މަޖިލީހުގެ ރިޔާސަތުންވެސް ވަރަށް ގިނަ ފަހަރަށް މި މައްސަލައާއި ގުޅޭ ގޮތުން ވާހަކަދައްކާފައިވާކަމަށެވެ.

މި މައްސަލައިގައި އިތުރަށް ކުރިއަށްދާނެ ގޮތް ނިންމާނީ އޮޑިޓަރ ޖެނެރަލް ގެ ރިޕޯޓް ލިބުމުންކަން ފާހަގަކުރައްވަމުން އުޝާމް ވިދާޅުވީ، ގާނޫނާއި ހިލާފަށް ގިނަ ކަންތައްތަކެއް ކޮށްފައި ހުރި ކަމަށާއި، މި މައްސަލަތައް ބަލައި، ގާނޫނީ ގޮތުން އަޅަން ޖެހޭ ފިޔަވަޅުތައް އަޅުއްވާނެ ކަމަށެވެ.

މިފަދަ ކަންކަން ތަކުރާރު ނުވުމަށްޓަކައި ގާނޫނަށް ގެންނަންޖެހޭ އިސްލާހުތައް ގެންނާނެކަމުގެ ޔަގީންކަން އުޝާމް ވަނީ ދެއްވާފައެވެ.