އެކްސްއެލް ދަޅުތަކެއް ވަގަށް ނެގި މީހަކު ހައްޔަރުކޮށް 15 ދުވަހަށް ބަންދުކޮށްފި އެވެ.
މި މައްސަލައިގައި ކްރިމިނަލް ކޯޓުން ބަންދުގެ މުއްދަތު ޖަހާފައިވަނީ އުމުރުން 37 އަހަރުގެ މުހައްމަދު ރަޝީދު ކިޔާ މީހެކެވެ. މީނާއަކީ ކުށުގެ ރިކޯޑު އޮތް ފަރާތެއްކަމަށް ކްރިމިނަލް ކޯޓުގެ ބަންދު އަމުރުގައި ބުނެފައިވެ އެވެ. އެގޮތުން އެކި މައްސަލަތަކުގައި 53 ފަހަރު އޭނާ ހައްޔަރުކޮށްފައިވާކަން ބަންދު އަމުރުގައިވެއެވެ:
މިފަހަރު މުހައްމަދު ރަޝީދު ހައްޔަރުކޮށްފައިވަނީ ވިލާމާޓް ފިހާރައިން ވައްކަން ކޮށްގެން ކަމަށް ފުލުހުން ބުނެފައިވާއިރު، ފުލުހުން އެތަނަށް ގޮސް މުހައްމަދު ރަޝީދާ ސުވާލު ކުރުމުން 3 އެކްސްއެލް ދަޅު ނެގިކަމަށް އޭނާ ވަނީ އެއްބަސްވެފައިވާ ކަމަށް ބަންދު އަމުރުގައިވެއެވެ.
އަދި އެ ފިހާރައިގެ ވެރި ފަރާތުންވެސް އޭނާ ހުއްޓުވާފައިވަނީ ފިހާރައިން 3 އެކްސްއެލް ދަޅު ނަގައިގެން ދާން އުޅުމުންކަމަށް އަމުރުގައި ބުނެފައިވެއެވެ.
މީގެ އިތުރުން، އޭނާ ވައްކަން ކުރިކަން ފާހަގަވެފައިވަނީ ސީސީޓީވީއިން ފެނުމުންކަމަށާ، އެ ފިހާރައިގެ ސެކިއުރިޓީ ގާޑުންނާ ސުވާލު ކުރުމުން، މުހައްމަދު ރަޝީދު ހިފަހައްޓާފައިވަނީ ފިހާރައިން ވައްކަން ކޮށްގެން ދާން އުޅެނިކޮށް ފަރީދީމަގު ރެޑްސްޓާ ދޮރުމަތިންކަމަށް ސެކިޔުރިޓީ ގާޑުން މައުލޫމާތު ދިން ކަމަށް ބުނެފައިވެއެވެ.
ކްރިމިނަލް ކޯޓުގެ އަމުރުގައިވާ ގޮތުން އޭނާ ކުށްކުރިކަމަށް ތުހުމަތު ކުރެވޭ ކޮންމެވެސް މިންވަރެއްގެ ހެކި ހުށަހަޅާފައިވެއެވެ. އެގޮތުން ސީނަށް ދިޔަ ފުލުހުންގެ ހާދިސާ ރިޕޯޓާއި ކުށުގެ ރިކޯޑު ހިމެނޭކަމަށް ބުނެފައިވެ އެވެ.
Advertisement
This content is created and paid for by advertisers and does not involve Voice Journalists
