އެމްޑީޕީސަރުކާރުގެ ދުވަސްވަރު އޮޅުވާލައިގެން ކޮށްފައިހުރި ކަންތައްތަކަށް ޖަވާބުދާރީ ވާންޖެހޭނޭކަމަށް ނައިބުރައީސް ހުސައިން މުހައްމަދު ލަތީފް ވިދާޅުވެއްޖެއެވެ.
މާލިއްޔަތު ގަވައިދާ ހިލާފަށް އެމްޑީޕީގެ ވެރިކަމުގައި ކޮށްފައިހުރި ހަރަދުތަކެއް ސަރުކާރުން ފެންމަތިކުރުމާއި ގުޅިގެން އެމްޑީޕީ އާއި ސަރުކާރާ ދެމެދު ވަނީ ކޮޅުމެއް ފެށިފައެވެ. މި ކޯޅުންތައް ފެށުނީ އިއްޔެ ފިނޭންސް މިނިސްޓަރާއި އެޓާނީ ޖެނެރަލް ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި އެމްޑީޕީން ބަޖެޓް ކުރުމެއްނެތި ދެ ބިލިއަނަށްވުރެ ގިނަ ރުފިޔާ ހޭދަކުރިކަަމަށް ހާމަކުރުމާއި ގުޅިގެންނެވެ.
މިކަމާއި ގުޅިގެން ނައިބުރައީސް ހުސައިން މުހައްމަދު ލަތީފް އެކްސްގައި ވިދާޅުވީ, މިއަދު ފެނިގެންދަނީ އެމްޑީޕީގެ ވެރިކަމުގައި ސަރުކާރަށް ލިބުނު ސުޕަރ މެޖޯރިޓީ ބޭނުންކޮށް، ނަހަމަ ގޮތުގައި ކުރަމުންދިޔަ ކަންކަން ފަސްއަޅާ ފޮރުވުމުގެ ނަތީޖާކަމަށެވެ. ނައިބުރައީސް ވިދާޅުވީ، ދިވެހި ދަޢުލަތަށް ކޮވިޑުގެ ދުވަސްވަރު ލިބުނު އެހީތަކުގެ ތަފްސީލު ވެސް ފޮރުވާފައިވަނީ މިބީދައިން ކަމަށް ވިދާޅުވެފައެވެ. އަދި އެމްޑީޕީން ޤާނޫނު އަސާސީއާއި ޚިލާފަށް ކޮށްފައިވާ ކަންކަމަށް ފުރިހަމައަށް ޖަވާބުދާރީ ވާން ޖެހޭނޭކަމަށްވެސް ނައިބުރައީސް ވަނީ ވިދާޅުވެފައެވެ.
އެމްޑީޕީ ސަރުކާރުން ބަޖެޓްކޮށްފައި ނުވާ 2 ބިލިއަނަށްވުރެ ގިނަ ރުފިޔާ ހޭދަކުރިކަމަށް ސަރުކާރުން ބުނުމާއި ގުޅިގެން އެމްޑީޕީ ވެރިކަމުގައި ހުންނެވި މާލީ ވަޒީރު މިއަދު ވިދާޅުވީ، ސަރުކާރުން ކުރަމުން ގެންދަނީ ކަނޑައެޅިގެން ދޮގު ވާހަކަތަކެއް ކަމަށް ވިދާޅުވެފައެވެ.
މިގޮތުން އެމްޑީޕީން މާލީ ހިސާބުތައް ބަލަހައްޓަމުން އައިސްފައިވަނީ، ފިނޭންދުން މީގެ ކުރިންވެސް މާލީ ހިސާބުތައް ބަލަހައްޓަމުން އައި އުސޫލުން ކަމަށާއި، އެމްޑީޕީގެ ވެރިކަމުގައިވެސް އޭގެ ކުރީގެ ސަރުކާރުން ހަރަދުކޮށް އަދަދުތަކެއް އެބީދައިން ހުރި ކަމަށެވެ. ކޭޝް ފްލޯގެ ތަފާތުވެ ޖެހިގެން އަންނަ އަހަރުގެ ހިސާބުތަކުގައި ޖެހުމަކީ ކުރިންވެސް ކަންކުރަމުން އައި ގޮތްކަމަށާއި، މާލީ ކަންކަމުގައި އަދުގެ ސަރުކާރަށް އެނގެންޖެހޭ އަސާސީ ކަންކަންވެސް ނޭނގޭކަމަށް އަމީރު ވަނީ ތުހުމަތު ކުރައްވާފައެވެ.
އިއްޔެ ބޭއްވި ނޫސްވެރިންގެ ބައްދަލުވުމުގައި ފިނޭންސް މިނިސްޓަރު މޫސާ ޒަމީރު ވިދާޅުވީ، ހަރަދުތައް ރެކޯޑް ކުރުމުގައި މިދިޔަ ސަރުކާރުން ވަރަށްބޮޑަށް އިހުމާލުވެފައިވާކަން ފާހަގަކުރެވިފައިވާކަމަށެވެ. މިގޮތުން ހަރަދުކުރި 2 ބިލިއަނަށްވުރެ ގިނަ ރުފިޔާ، ހަމަޖެހިފައިވާ އުސޫލުން ކުރެވުނު މުއާމަލާތްތަކުގައި ނުހިމަނައި ހުރިކަން މިނިސްޓަރު ވިދާޅުވިއެވެ.
މާލީ ވަޒީރު ވިދާޅުވީ އެކަން ހިނގާފައިވާގޮތް ބެލުމަށް އޮޑިޓަރ ޖެނެރަލް އަށް ހުށަހަޅުއްވާފައިވާކަމަށެވެ. އަދި އޮޑިޓަރ ޖެނެރަލްގެ އޮފީހުން މިހާރު މި މައްސަލަ ބައްލަވަމުން ގެންދަވާކަން ޒަމީރު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
