މިދިޔަ އަހަރު އެކަނިވެސް ރާއްޖެއަށް 15 ހާހަށްވުރެ ގިނަ ސައިކަލް އެތެރެކޮށްފައިވާކަމަށް މޯލްޑިވްސް ކަސްޓަމްސް ސާވިސްއިން ބުނެފިއެވެ.
ދުނިޔޭގެ ތަފާސްހިސާބު ދުވަހާ ގުޅުވައިގެން ކަސްޓަމްސްއިން އެކްސްގައި ކުރި ޕޯސްޓެއްގައި ހާމަކުރި މައުލޫމާތެއްގައި ބުނީ، 2023 ވަނަ އަހަރު ރާއްޖެއަށް 15،551 މޮޓޯ ސައިކަލް އެތެރެކޮށްފައިވާކަމަށެވެ. އަދި މީގެ އިތުރުން މިދިޔަ އަހަރުގެ ތެރޭގައި 1،347 ކާރުވެސް އެތެރެކޮށްފައިވާކަމަށް ކަސްޓަމްސްއިން ބުންޏެވެ.
މީގެ އިތުރުންވެސް ކަސްޓަމްސްއިން ވަނީ ތަފާސްހިސާބުތަކުގެ ބައެއް އުސްއަލިތައް ފާހަގަކޮށްފައެވެ.
މިދިޔަ އަހަރު ކަސްޓަމްސްއިން 2.7 މިލިއަން ޕާރުސަލް ވަނީ ސްކްރީން ކޮށްފައެވެ. މީގެ ތެރެއިން އަތުން ބަލައި ފާސްކުރީ 3.3 އިންސައްތަ ޕާރުސަލްކަމަށް ކަސްޓަމްސްއިން ބުނެއެވެ.
ކަސްޓަމްސްގެ މި ޕޯސްޓުން ދޭހަވިކަމަކީ ޕާރުސަލް ސްކްރީންކުރުމަށް އެ އިދާރާއިން ހޯދާފައިވާ ޒަމާނީ ކުރިއެރުމެވެ. ރާއްޖެއަކީ އިމްޕޯޓަށް ބަރޯސާވާ ޤައުމެކެވެ. މީގެ އިތުރުން އާއްމު ދިރިއުޅުމުގައި ވަރަށްގިނަ ދިވެހިން ރާއްޖެއިން ބޭރުގެ އޮންލައިން ފިހާރަތަކުން އެއްޗެހި ގަނެގެން އެތެރެކުރެއެވެ. ކަސްޓަމްސްއިން ބުނީ މިދިޔަ އަހަރު ތެރޭގައި ދުނިޔޭގެ 109 ޤައުމަކުން ރާއްޖެއަށް މުދާ އެތެރެކޮށްފައިވާކަމަށެވެ.
ކޮންމެ އަހަރެއްގެވެސް އޮކްޓޯބަރުމަހުގެ 20 ވަނަ ދުވަސް، ބައިނަލްއަޤްވާމީ ފެންވަރުގައި ފާހަގަކުރަނީ ތަފާސްހިސާބުގެ ދުވަހުގެ ގޮތުގައެވެ.
Advertisement
This content is created and paid for by advertisers and does not involve Voice Journalists
