އިސްލާމްދީނުގެ ޖުމްހޫރު ޢިލްމުވެރިން ދެކެވަޑައިގަންނަވާ ގޮތުގައި ހަނގުރާމައިގެ މައިދާނުގައި ދުޝްމަނުންނާ ހަނގުރާމަކުރަނިކޮށް މައިދާނުގައި ޝަހީދުވާ މީހުންގެ މައްޗަށް ކަށު ނަމާދު ކުރުމެއް ނޯންނަކަމަށް އިސްލާމީ ކަންތައްތަކާބެހޭ ވުޒާރާގެ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.  

ޑރ. ޝަހީމް މިއަދު މީސްމީޑިއާގައި ކުރެއްވި ޕޯސްޓެއްގައި ވިދާޅުވި ގޮތުގައި، މިފަދަ ޝަހީދުންގެ މައްޗަށް ކަށު ނަމާދު ކުރެވިދާނެކަމަށް ދެކެނީ ވަރަށް މަދު އިލްމުވެރިއެކެވެ. އަދި ޖާއިޒުކަމަށް ދެކޭ އިލްމުވެރިން ވެސް ބުނަނީ އެއީ ވާޖިބު ކަމެއް ނޫންކަމަށެވެ. 

މިއާއެކު އުޙުދު ހަނގުރާމައިގެ މިސާލު ދެއްވަމުން، ޑރ. ޝަހީމް ފާހަގަކުރެއްވި ގޮތުގައި އެ ހަނގުރާމައިގައި ޝަހީދުވި މާތް ޞަޙާބީންގެ މައްޗަށް، އަދި ކީރިތި ރަސޫލާގެ މާތް ބޮޑު ބޭބޭފުޅު ޙަމްޒަތުގެފާނުގެ މައްޗަށްވެސް ކީރިތި ރަސޫލާ ކަށު ނަމާދު ކުރައްވާފައި ނުވެއެވެ.

“އުޙުދު ހަނގުރާމައިގައި ޝަހީދުވި މާތް ޞަޙާބީންގެ މައްޗަށް ކީރިތި ރަސޫލާ صلى الله عليه وسلم ކަށު ނަމާދު ކުރައްވާފައި ނުވެއެވެ. އެހަނގުރާމައިގައި އެކަލޭގެފާނުގެ މާތް ބޮޑު ބޭބޭފުޅު ޙަމްޒަތުގެފާނުގެ ވެސް ޝަހީދުވެވަޑައިގެންނެވިއެވެ. ޙަމްޒަތުގެފާނުގެ މައްޗަށް ވެސް، އެހެން ބޭކަލެއްގެ މައްޗަށް ވެސް ވަޅުލުމުގެ ކުރިން ކަށު ނަމާދުކުރައްވާފައިނުވެއެވެ.“ ޝަހީމް ވިދާޅުވިއެވެ. 

ޝަހީމް މިފަދައިން ވިދާޅުވެފައިވާއިރު، ފަލަސްޠީނުގެ މިނިވަންކަމަށްޓަކައި ޖިހާދުކުރަމުންދާ ހަމާސް ޖަމާޢަތުގެ ލީޑަރ ޔަހްޔާ ސިންވާރު، އިސްރާއީލްގެ ޔަހޫދީންނާ ދެކޮޅަށް ހަނގުރާމަ ކުރަމުންދަނިކޮށް ޝަހީދުވެފައިވާކަން އިއުލާން ކޮށްފައިވާއިރު، އޭނާގެ މައްޗަށް ޣައިބަށް ކަށު ނަމާދު ނުކުރާތީ ބައެއް ފަރާތްތަކުން އަންނަނީ، އެކަމާމެދު ސުވާލު އުފައްދައި، ސަރުކާރަށް ފާޑުކިޔަމުންނެވެ.