އެއްގަމު އުޅަނދު ދުއްވުމުގެ ލައިސަންސް މިހާރު 39 ރަށަކުން ނެގޭނޭކަމަށް ޓްރާންސްޕޯޓް މިނިސްޓްރީން ބުނެފިއެވެ.
ވޮއިސްއަށް މައުލޫމާތު ހިއްސާކުރަމުން ޓްރާންސްޕޯޓް މިނިސްޓްރީގެ އޮފިޝަލަކު ވިދާޅުވީ، އެއްގަމު އުޅަނދު ދުއްވުމުގެ ލައިސަންސް ނެގުމުގެ ހުއްދަ މިފަހުން އިތުރު 10 ރަށަކަށް ދީފައިވާކަމަށެވެ.
އެންމެފަހުން ހުއްދަ ދިން ރަށްތަކުގެ ތެރޭގައި ހިމެނެނީ، ހއ އަތޮޅުން މޮޅަދޫ، އިހަވަންދޫ އަދި ކެލައެވެ. ބ އަތޮޅުން ކެންދޫ ހިމެނޭއިރު ޖެހިގެން އޮންނަ ރ އަތޮޅުން ހުއްދަ ދީފައިވަނީ ހުޅުދުއްފާރަށެވެ. ތ އަތޮޅުން ވިލިފުއްޓަށްދީފައިވާއިރު، ފ އަތޮޅުން ދީފައިވަނީ ދަރަނބޫދޫ އަށެވެ. މީގެ އިތުރުން ގދ ގައްދޫ އާއި މ ދިއްގަރު ކައުންސިލަށްވެސް ވަނީ އެއްގަމު އުޅަނދު ދުއްވުމމުގެ ލައިސަންސް ދީފައެވެ.
އަތޮޅު ކައުންސިލްތަކުގެ ތެރެއިން މިފަހަރު އެއްގަމު އުޅަނދު ދުއްވުމުގެ ލައިސަންސް ދީފައިވަނީ ވ އަތޮޅު ކައުންސިލަށެވެ.
ޓްރާންސްޕޯޓުން އެ އަތޮޅުތަކުގެ ކައުންސިލްތަކަށް އެއްގަމު އުޅަނދު ދުއްވުމުގެ ލައިންސް ނެގުމުގެ ހުއްދަ ދީފައިވަނީ އެކަމަށް ބޭނުންވާ މީހުންވެސް ތަމްރީނުކުރުމަށް ފަހުއެވެ. މީގެ އިތުރުން ލައިސަންސް ނެގުމުގެ ކަންކަން ހަމަޖެހިފައިވާ އުސޫލުން މޮނިޓަރކުރަމުންދާކަމަށްވެސް ޓްރާންސްޕޯޓް މިނިސްޓްރީން ބުނެއެވެ.
Advertisement
This content is created and paid for by advertisers and does not involve Voice Journalists
