ދިވެހި ރާއްޖޭގެ ޒުވާނުންގެ ދުަވސް މިއަދު ފާހަގަކުރަމުންދާއިރު، ސަރުކާރުން ގެންދަނީ, 18 އަހަރުފުރޭ ޒުވާނުންގެ ހައްޤުތައް ހަނިކުރަމުންކަމަށް އެމްޑީޕީގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.

ރައްޖޭގައި މިއަދު ފާހަގަކުރަމުންގެންދާ ޒުވާނުންގެ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައި އެމްޑީޕީ ސަރުކާރުގެ ހާރިޖީ ވަޒީރުކަންވެސް ކުރެއްވި ޝާހިދު ވިދާޅުވީ، ޒުވާނުންގެ ދުވަސް މިއަދު ފާހަގަކުރަމުންދާއިރު, 18 އަހަރު ފުރޭ ޒުވާނުންގެ ޙައްޤުތައް މި ސަރުކާރުން ނިގުޅައިގަނެ ހަނިކުރަމުންގެންދާތީ އެކަމާ ދެކޮޅަށް އެންމެހާ ޒުވާނުންވެސް މިއަދު އަޑުފުލަންޖެހޭ ކަމަށެވެ.

ޝާހިދު ވިދާޅުވީ 2008 ވަނަ އަހަރު ޢަމަލުކުރަންފެށި ޤާނޫނު އަސާސީ އެކުލަވާލި ރައްޔިތުންގެ ޚާއްސަ މަޖިލީހުގައި އެމްޑީޕީ އިން އިސްނަގައި ވަކާލާތުކޮށް 18 އަހަރުން މަތީގެ ކޮންމެ މީހަކަށް އިންތިޚާބުތަކުގައި ވޯޓު ދިނުމާއި އިންތިޚާބުތަކުގައި ވާދަކުރުމުގެ ޙައްޤު ލިބުނު ދުވަސް، ޒުވާނުންގެ ދުވަހުގެ ގޮތުގައި ރައީސް ސާލިޙު ހަމަޖެއްސެވީ އެމްޑީޕީއަކީ އަބަދުވެސް ޒުވާނުންގެ ޙައްޤުތައް ކަށަވަރުކުރުމުގައި ދެގޮތެއް ނުވެ ދެމި އޮންނަ ޕާޓީއަކަށް ވާތީކަމަށެވެ. 

އެގޮތުން ޝާހިދު ވަނީ، ޒުވާނުންގެ ދުވަހު އެންމެހާ ދިވެހި ޒުވާނުންވެސް ޢަޒުމު އާކުރަންވީ، ބުރަމަސަތްކަތާއި ޤުރުބާނީއިން ހޯދި ޙައްޤުތައް ހިފެހެއްޓުމަށްކަމަށް ވިދާޅުވެ އެކަމުގައި ދެމިތިބުމަށް ޒުވާނުނަށް އިލްތިމާސްކުރައްވާފައެވެ. 

ރާއްޖޭގައި ޒަމާނީ ޑިމޮކްރަސީ ތައާރަފްވެ، ރައީސުލްޖުމްހޫރިއްޔާ ހޮވުމަށް ވޯޓުލެވޭ އުމުރުފުރާ 21 އަހަރުން 18 އަހަރަށް ބަދަލުކުރީ އެމްޑީޕީން އިސްވެ ކުރި މަސައްކަތްތަކުންކަން ފާހަގަކޮށްލެވެެވެ.