މަރުގެ ހުކުމް ތަންފީޒުކުރުމަށް ތައްޔާރުވަމުންދާކަމަށާއި، މަސައްކަތްކުރަނީ ވީ އެންމެއަވަހަކަށް މަރުގެ ހުކުމް ތަންފީޒުކުރަންކަމަށް ދާހިލީ ވަޒީރު، އަލީ އިހްސާން ވިދާޅުވެއްޖެއެވެ.
މަރުގެ ހުކުމް ތަންފީޒު ކުރުމަށް ކުރަމުންގެންދާ މަސައްކަތްތަކާ ބެހޭ ގޮތުން މިނިސްޓަރު އިހްސާން ވިދާޅުވީ، ރާއްޖެއަކީ އިސްލާމީ ޤައުމެއްކަމުން، ބައިނަލްއަޤްވާމީ ކަމާބެހޭ ފަރާތްތަކަށް އެކަމުގައި ސަރުކާރުގެ ސިޔާސަތު ހާމަކޮށްފައިވާނޭކަމަށެވެ. މިކަމަކީ ވަރަށްގިނަ ކަންކަން ފުރިހަމަވިކަން ކަށަވަރުކުރަންޖެހޭ ކަމަކަށްވާއިރު، މަރުގެ އަދަބު ތަންފީޒުކުރުމުގައި ބަލަންޖެހޭ މިންގަނޑުތަކެއް ހުންނަކަމަށް މިނިސްޓަރު ވިދާޅުވިއެވެ.
މިގޮތުން މިކަމުގައި ބައިނަލްއަޤްވާމީ ހުރިހާތަނެއްގައިވެސް މިންގަނޑުތަކެއް ހުންނަކަމަށާއި، އެމީހާއަށް އެދެވޭ އަދަބަކީ އަލުން އިޔާދަނުކުރެވޭ އަދަބަކަށްވާއިރު، އެ ހުރިހާ މިންގަނޑަކުން ބަލަންޖެހޭ ކަންކަމާއި އުސޫލްތަކެއް ހުންނަކަން މިނިސްޓަރު ފާހަގަކުރެއްވިއެވެ.
ސުވާލު ނުއުފެދޭވަރަށް ދެ މީހެއްގެ މައްސަލަ އެބައުޅޭ. އެހެންނަމަވެސް އަނެއްބައިމީހުންގެ ކޮންމެވެސް ވަރަކަށް ޤާނޫނީގޮތުން މައްސަލަތަކެއް އެބަހުރި. ދެން އޮތީ ތަންފީޒީ މަރުހަލާ. އެކަމަށް އަޅުގަނޑުމެން ތައްޔާރުވާންޖެހޭ އުސޫލްތަކަކާ ޤަވާއިދުތަކެއް ހުރޭ. އަދި ތަންވެސް ތައްޔާރުކޮށް މީހުންވެސް ތައްޔާރުކުރަންޖެހޭ
ހޯމް މިނިސްޓަރު އިހްސާން ވިދާޅުވިއެވެ
މިނިސްޓަރު އިތުރަށް ވިދާޅުވީ ސަރުކާރުގެ އަމާޒަކީ މަރުގެ ހުކުމް ތރަންފީޒުކުރުމުގެ ގޮތުން ކުރަންޖެހޭ މަސައްކަތް ނިމުނުހާ އަވަހަކަށް ރާއްޖޭގައި މަރުގެ އަދަބު ތަންފީޒުވެގެން ދިއުންކަމަށެވެ. ރާއްޖޭގައި މަރުގެ ހުކުމް ތަންފީޒު ކުރުމުގެ މަރުހަލާގައި ހަތަރު މީހަކު ތިބިއިރު، މަރުގެ ހުކުމް ތަންފީޒުކުރާ މަރުހަލާގައި ދެ މީހަކު އެބަތިއްބެވެ.
އޭގެ ތެރެއިން އެކަކީ މަޝްހޫރު ލިޔުންތެރިޔާ އަހުމަދު ނަޖީބު މަރާލިކަަމަށް ކޯޓުތަކުގެ ހުކުމުން ސާބިތުވެފައިވާ މ. މަސްރޫރާ އަހްމަދު މުއްރަތެވެ.
Advertisement
This content is created and paid for by advertisers and does not involve Voice Journalists
