ބައިނަލްއަޤްވާމީ ވިޔަފާރީގެ މުއާމަލާތްތަކުގައި އެމެރިކާ ޑޮލަރު ބޭނުންކުރުން ހުއްޓާލަންޖެހޭކަމަށް ރަޝިއާގެ ރައީސް ވްލަޑިމިއާ ޕުޓިން ވިދާޅުވެއްޖެއެވެ.

ރަޝިއާގެ ކަޒާންގައި މިހާރު ކުރިއަށްދާ ބްރިކްސް ސަމިޓްގައި ވާހަކަދައްކަވަމުން ޕުޓިން ވިދާޅުވީ، އެމެރިކާއިން ޑޮލަރު ބޭނުންކުރަމުންދަނީ ސިޔާސީ ހަތިޔާރެއްގެ ގޮތުގައި ކަމަށާއި، ޑޮލަރު ނޫންގޮތެއް ހޯދަންޖެހިފައިވާކަމަށެވެ.

ބައިނަލްއަޤްވާމީ ވިޔަފާރީގެ މުއާމަލާތްތަކުގައި ޑޮލަރަށް ބަރޯސާވުން ހުއްޓާލެވޭނޭކަން ފާހަގަކުރައްވަމުން ޕުޓިން ވިދާޅުވީ، މިކަމަކީ މިހާރުވެސް ކުރެވޭނޭ ކަމެއްކަން ޗައިނާ އާއި ރަޝިއާއިން ދައްކުވައިދީފައިވާކަމަށް ޕުޓިން ފާހަގަކުރެއްވިއެވެ.

ރަޝިއާގެ ރައީސް ވްލަޑިމިއާ ޕުޓިންއަކީ ހުޅަނގުން ގެންގުޅޭ މާލީ އަދި އެނޫންވެސް ސިޔާސަތްތަކާ ވަރަށް ދެކޮޅު ބޭފުޅެކެވެ. ރަޝިއާއިން ޔުކްރެއިނަށް ހަމަލާތައް ދޭން ފެށުމާއެކު، ހުޅަނގުގެ ޤައުމުތަކުން ވަނީ، ސްވިފްޓް ޕޭމަންޓް ނެޓްވޯކުން ރަޝިއާ ބޭރުކޮށްލާފައެވެ. ސްވިފްޓް ނެޓްވަރކަކީ ދޭދޭ ޤައުމުތަކުން ފައިސާ ފޮނުވުމުގައި ބޭންކުތަކުން ބޭނުންކުރާ ނިޒާމެކެވެ.

ސްވިފްޓުން ރަޝިއާ ބްލޮކްކުރުމުން ޕުޓިން ވިދާޅުވެފައިވަނީ، އެއީ ރަޝިއާއަށް މާބޮޑު މައްސަލައަކަށް ނުވާނޭކަމަށެވެ.

ޑޮލަރު ނޫންގޮތެއް ހޯދަން ޖެހިފައިވާކަމަށް ޕުޓިން ވިދާޅުވިއިރު، ބްރިކްސް ޤައުމުތަކުގެ މެދުގައި މިފަހަރު ކުރިއަށްދާ ސަމިޓްގެ ތެރެއިން މިކަމަށް ގޮތެއް ހޯދުމަށް މަޝްވަރާކުރާނޭކަމަށް ހަބަރުތައް ބުނެއެވެ. ސަބަބަކީ ބްރިކްސްގެ ޤައުމުތައްކަމަށްވާ ޗައިނާ، އިންޑިއާ ބްރެޒިލްގެ އިތުރުން ދެކުނު އެފްރިކާއިން މީގެ ކުރިންވެސް ވަނީ ބްރިކްސް ޤައުމުތަކުން އިގްތިސާދީ ކަންކަމުގައި އެއް ވިސްނުމެއް ގެންނަން ޖެހޭކަމާ ގުޅޭގޮތުން ވާހަކަތައް ދައްކާފައެވެ.