ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ނިންމަވަމުން ގެންދަވަނީ ފަސޭހަ ނިންމުންތަކެއް ނޫން ކަމަށާއި، އެ ނިންމުންތަކުން ސާބިތުކޮށްދެނީ މިއީ އެކަކު ދެމީހެއްގެ ޤައުމެއް ނޫންކަން މަސްވެރިކަމާބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ. 

ޝިޔާމް މިހެން ވިދާޅުވެފައިވަނީ އޭނާގެ އެކްސް (ކުރީގެ ޓްވިޓަރ) އެކައުންޓްގައި ކުރެއްވި ޕޯސްޓެއްގައެވެ. މި ޕޯސްޓްގައި ޝިޔާމް ފާހަގަކުރައްވާފައިވަނީ ރައީސް މުޢިއްޒު އޭނާގެ ވެރިކަމުގެ ފުރަތަމަ ދުވަހުން ފެށިގެން ދިވެހިރާއްޖޭގެ އިޖްތިމާޢީ ފޭރާން ހެޔޮކޮށް، މާލީ ހާލަތު ރަނގަޅުކޮށް، ދިވެހިންނަށް ދިވެހިންގެ ރާއްޖެ އަނބުރާ ހޯއްދަވައިދެއްވުމުގެ ބުރަ އަދި އުނދަގޫ މަސައްކަތްޕުޅު ފައްޓަވާފައިވާ ކަމަށެވެ.

"ދިވެހި މުޖުތަމަޢުގައި މޫލެފައިވާ ނުބައި އާދަތައް ހުރިކަން އެންމެން ޤަބޫލުކުރާ ޙަޤީޤަތެއް. އެހެންނަމަވެސް ނެތީ ތެދުވެރި ނިޔަތަކާއެކު އެކަންކަމަށް ކުރިމަތިލައްވައިގެން ހައްލުކުރައްވާނެ ވެރިން،" ޝިޔާމް ވިދާޅުވިއެވެ.

ޝިޔާމް އިތުރަށް ވިދާޅުވީ ރައީސް މުޢިއްޒު ނިންމަވާ ނިންމެވުންތަކަކީ ސިޔާސީ ގޮތުން މަޤުބޫލު ނިންމެވުންތަކެއް ނޫން ކަމަށާއި، ބައެއް ނިންމެވުންތަކަކީ ނުފޫޒުގަދަ ބައެއް ވިޔަފާރިވެރިންގެވެސް ނުރުހުންތެރިކަން އަމާޒުވާ ނިންމެވުންތަކެއް ކަމަށެވެ. ނަމަވެސް، ރައީސް މުޢިއްޒު މިއަދު ސާބިތުކޮށްދެއްވަނީ އެމަނިކުފާނަކީ ދިވެހިންގެ ވެރިއެއްކަމާއި، އަންނަން އޮތް ޖީލުތަކަށް މި ޤައުމު ސަލާމަތްކޮށްދެއްވުމުގެ މުހިންމު ބުރަ މަސައްކަތްޕުޅެއް ކުރައްވަމުން ގެންދަވާ ކަމަށް ޝިޔާމް ފާހަގަކުރެއްވިއެވެ.

"އަޅުގަނޑުމެން ބަލަންވީ މިކަންކަމުގައި އަޅުގަނޑުމެން ދިރިތިބި މީހުންނަށް އެމަނިކުފާނަށް ކޮށްދެވޭނީ ކޮންކަމެއްތޯ. މާދަމާ މި ފަސްގަނޑުގައި ދިރިއުޅެން ތިބޭނީ ހަމަ އަޅުގަނޑުމެންގެ ދަރިންނާއި ދަރިންގެ ދަރިން،" ޝިޔާމް ވިދާޅުވިއެވެ.

އަންނަ އަހަރަށް ދައުލަތުގެ ބަޖެޓު ހުށަހަޅާއިރު އިގްތިސާދީ އިސްލާހީ އެޖެންޑާގެ ދަށުން، ދައުލަތުގެ ޚަރަދުތައް ކުޑަކުރުމުގެ ޝަރުއީ ދާއިރާގެ އިސްވެރިން އަދި ރައްޔިތުންގެ މަޖިލީހުގެ މެންބަރުންގެ މުސާރަ ކުޑަ ކުރުމަށާއި ސިޔާސީ މަޤާމުތަކުގައި ތިއްބަވާ ބޭފުޅުންގެ މުސާރައިން 10 އިންސައްތަ އުނިކުރުމަށާއި މިނިވަން މުއައައްސަސާތަކުގެ އިސްވެރިންގެ މުސާރައިން 10 އިންސައްތަ އުނިކުރުމުގެ އިތުރުން، ރައީސް މުޢިއްޒުގެ މުސާރައިން 50 އިންސައްތަ އުނި ކުރައްވަން އެމަނިކުފާނު ވަނީ ނިންމަވާފައެވެ.