ބޮޑު ޚަރަދު ދީފައި އެޅި ޓެކްސް އެޕީލް ޓްރައިބިޔުނަލް އިމާރާތުގައި ކޯޓް ރޫމެއް ވެސް ނެތް ކަމަށާ، އެތަނަށް 7 އަހަރުން ބެލުނީ އެންމެ 2 މައްސަލަކަން ފާހަގަ ކުރައްވައި، އެފަދަ ތަނެއް ބެހެއްޓުމުގެ މަޤުޞަދާއިމެދު މަހިބަދޫ ދާއިރާގެ މެންބަރު އަޙްމަދު ޠާރިޤު (ޓޮމް) ސުވާލު އުފައްދަވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި، ޓެކްސް އެޕީލް ޓްރައިބިޔުނަލްގެ ހުސްވެފައިވާ މަގާމު ތަކަށް ކަނޑައަޅަން ކޮމިޓީން ފާސްކުރި މެންބަރުން އައްޔަނު ކުރުމާއިމެދު ބަހުސް ކުރައްވަމުން، ޓޮމް ވިދާޅުވީ، އެ ޓްރައިބިޔުނަލަށް އައްޔަނު ކުރުމަށް ހުށަހަޅާފައިވާ މެންބަރުންނާމެދު އޭނާގެ ނުރުހުމެއް ނެތް ކަމަށެވެ.
އެހެން ނަމަވެސް، އެތަނަށް މެންބަރުން އައްޔަނު ކުރުމުގެ ވާހަކަ ދެކެވޭއިރު، އެ ޓްރައިބިޔުނަލާއި ގުޅޭ ގޮތުން ބައެއް ކަންކަން ފާހަގަކޮށްލަންޖެހޭ ކަމަށެވެ. އެގޮތުން ވިދާޅުވީ، ރާއްޖޭގައި އެފަދައިން އުފައްދަމާފައި ހުރި މުވައްސަސާތައް ވަރަށް ގިނަ ކަމަށެވެ. އެހެން ނަމަވެސް، އެ މުވައްސަސާ ތަކުން ކުރާ މަސައްކަތާއި ނެރެދޭ ނަތީޖާތައް މަދު ކަމަށެވެ.
މީގެ ގާތްގަނޑަކަށް 4-5 އަހަރު ކުރިން ކޮމިޓީން ބެލިއިރުގައި، މުޅި އެ އެޕީލް ޓްރައިބިޔުނަލުން ނިންމާފައި އޮތީ 2 މައްސަލަ. އެއީ ގާތްގަނޑަކަށް 7 އަހަރުތެރޭގައި ދެ މައްސަލަ. ދެން، އެމްޑީޕީ ވެރިކަމުން އައިސް، މި ވެރިކަމުގެ ފުރަތަމަ އަހަރާ ދޭތެރޭ ބެލިއިރު، އެމްޑީޕީ ވެރިކަމުގައި ޓެކްސް އެޕީލް ޓްރައިބުޔުނަލްގެ އޮފީސް އިމާރާތް ހެދުމަށް 2 މިލިޔަން ރުފިޔާ ޚަރަދު ކޮށްފައި، އަމިއްލަ ތަނެއްގައި. މިހާރު އެތަނުގެ ކުއްޔަކީ މަހަކު 3،75000 ރުފިޔާ.
މަހިބަދޫ ދާއިރާގެ މެންބަރު އަޙްމަދު ޠާރިޤު (ޓޮމް)
މިއާއެކު ޓޮމް ވިދާޅުވީ ގާނޫނުގެ ތެރެއިން ޓެކްސް އެޕީލް ޓްރައިބުޔުނަލެއް ހަދާފައި، އިންނައިރު އެތަނަށް އެކަމާއި ގުޅޭ މައްސަލަ ހުށަނޭޅޭ ނަމަ، އަދި ހުށަހެޅޭ މައްސަލަ ނުބެލޭ ނަމަ، ގާނޫނުތައް ހަދަން ތިބޭ މަޖިލިސް މެންބަރުން އެކަމާމެދު ވިސްނާލަންޖެހޭ ކަމަށެވެ.
އެފަދަ ތަނަކަށް 5 މެންބަރުން ނަގައިގެން، އަޅުގަނޑުމެން އެތަނުގައި ބޮޑު މުސާރައެއް ދީގެން ބަޔަކު ބައިތިއްބަންވީތޯ ނޫންތޯ މި މަޖިލީހުން ވިސްނާލަންޖެހޭ ކަމެއް.
މަހިބަދޫ ދާއިރާގެ މެންބަރު އަޙްމަދު ޠާރިޤު (ޓޮމް)
އެހެންކަމުން، ޓެކްސް އާއި ގުޅުންހުރި އެފަދަ މައްސަލަތައް، ސިވިލް ކޯޓް ފަދަ ކޯޓެއް މެދުވެރިކޮށް ބެލެވޭނެ ގޮތަކަށް ގާނޫނަށް ބަދަލު ގެނައުމަށް ސަރުކާރުގެ ބަންޑާރަ ނާއިބަށާއި މަޖިލީހަށް ޓޮމް ވަނީ ހުށަހަޅުއްވާފައެވެ.
Advertisement
This content is created and paid for by advertisers and does not involve Voice Journalists
