ސިޔާސީ މަޤާމުތަކަށް ކުރާ ހޭދައާއި ބެހޭގޮތުން ބައެއްް ފަރާތްތަކުން ފަތުރަމުންދިޔައީ ދޮގު ޚަބަރުތަކެއް ކަމަށާ އެކަން ކަމުގެ ހަގީގަތް މިއަދު ހާމަވެފައިވާ ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެއެވެ.
ސަރުކާރުން މިއަދު ވަނީ 5.1 ބިލިއަން ރުފިޔާގެ ސަޕްލިމެންޓަރީ ބަޖެޓެއް މަޖިލީހަށް ހުށަހަޅާފައެވެ.
އެ ބަޖެޓް ހުށަހަޅުއްވަމުން މާލީ ވަޒީރު މޫސާ ޒަމީރު ވަނީ ސަރުކާރުގައި އެކިއެކި މަގާމުތަކަށް އައްޔަންކޮށްފައި ތިބޭ ސިޔާސީ މުވައްޒަފުންގެ މުސާރައާއި އިނާޔަތްތަކުގެ ގޮތުގައި ހޭދަކުރަނީ މުޅި ސަރުކާރުގެ މުސާރައާއި އިނާޔަތަށް ހޭދަކުރާ މިންވަރުގެ ހަތަރު އިންސައްތަ ކަން ފާހަގަކުރައްވާފައެވެ.
ސިޔާސީ ފަރާތްތަކުގެ މުސާރައަށް ކުރާ ހޭދައަކީ ސަރުކާރުގެ މުޅި މުސާރައާއި އިނާޔަތް ތަކަށް ހޭދަކުރާ މިންގަނޑުގެ %4 އަށްވުރެ ދަށް އަދަދެއް. އަދި މުޅި ދައުލަތުގެ ޚަރަދުގެ %1.
މާލީ ވަޒީރު މޫސާ ޒަމީރު
މިކަމާއި ގުޅިގެން ހީނާ އެކްސްގައި ކުރެއްވި ޕޯސްޓެއްގައި ވިދާޅުވީ، ސިޔާސީ މަޤާމުތަކަށް ކުރާ ހޭދައާއި ބެހޭގޮތުން ބައެއް ފަރާތްތަކުން ފަތުރަމުންދިޔަ ދޮގު ޚަބަރުތަކުގެ ހަގީގަތް މާލީ ވަޒީރު މިއަދު ހާމަކޮށްދެއްވާފައިވާ ކަމަށެވެ.
މި އަހަރަށް ރައްޔިތުންގެ މަޖިލީހުން ފުރަތަމަ ފާސްކުރި ބަޖެޓުގައި ސަރުކާރު މުވައްޒަފުންގެ މުސާރައާއި އިނާޔަތުގެ ގޮތުގައި ބަޖެޓުކޮށްފައިވަނީ 11.95 ބިލިއަން ރުފިޔާއެވެ. އަދި ސަޕްލިމެންޓަރީ ބަޖެޓުގައި މުސާރައާއި އިނާޔަތަށް އިތުރު 24.4 މިލިއަން ރުފިޔާ ހިމަނާފައި ވާއިރު، އެކަމަށް ޖުމުލަ 11.98 ބިލިއަން ރުފިޔާއަށް އަރާނެއެވެ.
އެ އަދަދުގެ ހަތަރު އިންސައްތައަކީ 479.2 މިލިއަން ރުފިޔާއެވެ.
Advertisement
This content is created and paid for by advertisers and does not involve Voice Journalists
