ރައްޔިތުންގެ މަޖިލީހަށް ސަރުކާރުން މިއަދު ހުށަހެޅި ސަޕްލިމަންޓަރީ ބަޖެޓުން އިތުރަށް ދަރަނި ބޮޑުވުން ނޫންކަމެއް ނުވާނޭކަމަށް އިދިކޮޅު އެމްޑީޕީއަށް ނިސްބަތްވާ މެމްބަރުން ވިދާޅުވެއްޖެއެވެ.
ސަޕްލިމަންޓަރީ ބަޖެޓް ބަހުސްގައި ވާހަކަދައްކަވަމުން އެމްޑީޕީއަށް ނިސްބަތްވާ ހުޅުމާލޭ ދެކުނު ދާއިރާގެ މެމްބަރު ޑރ.އަހުމަދު ޝަމްހީދު ވިދާޅުވީ ސަޕްލިމަންޓަރީ ބަޖެޓަށް ބަލާއިރު ދައުލަތުގެ އާމްދަނީ މާބޮދަށް އިތުރުވާނޭކަމަށް ލަފާކޮށްފައި ނުވާކަމަށާއި، މިހާރު ޖަހާފައި އިންގޮތުން ދައުލަތުގެ އާމްދަނީއަކީ 34 ބިލިއަން ރުފިޔާ ކަމަށެވެ. ޝަމްހީދު ވިދާޅުވީ ސަޕްލިމަންޓަރީ ބަޖެޓާއެކު މިއަހަރުގެ ބަޖެޓް ހަރަދުކޮށް ނިމޭއިރު މިއަހަރު ދައުލަތުގެ ދަރަންޏަށް 21 ބިލިއަން ރުފިޔާ އިތުރުވެގެންދާނޭ ކަމަށެވެ.
މިއީ ރާއްޖޭގެ ތާރީހުގައިވެސް އަހަރެއްގެ ތެރޭގައި ދައުލަތުގެ ދަރަނި މިހާބޮޑަށް އިތުރުވެގެންދާނޭ ފުރަތަމަ ފަހަރުކަމަށް ޝަމްހީދު ފާހަގަކުރެއްވިއެވެ.
ބަޖެޓާ ގުޅޭގޮތުން ވާހަކަދައްކަވަމުން ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ (ގަޕޯ) ވިދާޅުވީ މިއަހަރަށް ފާސްކުރި ބަޖެޓުން އެއްވެސް ކަމެއް ކޮށްފައިނުވާއިރު، ސަޕްލިމަންޓަރީ ބަޖެޓެއް ފާސްކުރަން އުޅުމުގެ ބޭނުމެއް ނޭނގޭކަމަށެވެ. ސަރުކާރުން މިއަހަރު ހަރަދުތަކެއް ކުރިނަމަވެސް ތަރައްޤީއަށް އެއްވެސް ހަރަދެއް ކުރިކަން ފެންނަން ނެތްކަމަށް ގަޕޯ ފާހަގަކުރެއްވިއެވެ.
ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ (ގަޕޯ
ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ވިދާޅުވީ އިތުރު ބަޖެޓެއް ހުށަހެޅިއިރު ހަރަދުކުރި ގޮތް އެނގެން ނެތްކަމަށާއި، އެމްޑީޕީގެ ވެރިކަމުގައި ދައުލަތުގެ ހަރަދު ބަރަދުގެ ދެފުއްފެންނާނޭހެން ހިސާބުތައް އާއްމުކުރަމުން ގެންގޮސްފައިވާކަމަށެވެ.
މިއަދުގެ ޖަލްސާގައި ސަރުކާރަށް ނިސްބަތްވާ މެމްބަރުން ވަނީ މިއީ ކޮންމެހެންވެސް ހުށަހަޅަންޖެހޭ ބަޖެޓެއްކަން ފާހަގަކުރަމުން މި ބަޖެޓުން ރައްޔިތުންނަށް އިތުރު ފާގަތިކަމެއް ލިބިގެންދާނޭކަމަށް ވިދާޅުވެފައެވެ.
ސަރުކާރުން ޚަރަދުތައް ކޮންޓްރޯލް ކުރުމަށް އެޅި ފިޔަވަޅުތަކާއި އެކީ، މި އަހަރަށް ހުށަހަޅާ ސަޕްލިމަންޓަރީ ބަޖެޓަކީ 5.1 ބިލިއަން ރުފިޔާގެ ސަޕްލިމަންޓަރީ ބަޖެޓެކެވެ.
ސަރުކާރުން ސަޕްލިމެންޓަރީ ބަޖެޓެއް ހުށަހެޅިއިރު، މިއަހަރަށް ކަނޑައެޅި ބަޖެޓުން، މިދިޔަ މަހުގެ ނިޔަލަށް ބަޖެޓުގެ 74 އިންސައްތަ ހޭދަކުރެވިފައިވާކަމަށް ފިނޭންސް މިނިސްޓްރީން ބުނެއެވެ.
ސަޕްލިމެންޓަރީ ބަޖެޓާ ގުޅޭގޮތުން ފިނޭންސް މިނިސްޓަރު މޫސާ ޒަމީރު ވިދާޅުވީ ކުރީ ސަރުކާރާ ޚިލާފަށް، މި ސަރުކާރުން ސަޕްލިމަންޓަރީ ބަޖެޓް ހުށަހަޅާފައިވަނީ މާލިއްޔަތުގެ ގާނޫނުގައި ވާގޮތަށް ކުރިއަށް އޮތް މަސްތަކުގައި ހިނގާނެކަމަށް ލަފާކުރާ ޚަރަދު ކުރިއާލާ ރައްޔިތުންގެ މަޖިލީހަށް އިއުލާނުކޮށް ހުއްދަ ހޯދުމަށް އެދުމުގެ ތެރެއިން ކަމަށެވެ.
Advertisement
This content is created and paid for by advertisers and does not involve Voice Journalists
