ސަރުކާރުތަކުން ނިޒާމުގެ ތެރޭގައި ތައާރަފްކޮށްފައި ހުރި ބޮޑެތި ފަސާދަތަކަކީ އަބަދުވެސް ޝަރުޢީގޮތުން ދެކޮޅު ކަންކަން ކަމަށާ، އެކަންކަން އެއްވެސްއިރަކު ހުއްދަ ނުކުރައްވާ ކަމަށް މައްޗަންގޮޅީ އުތުރު ދާއިރާގެ މެންބަރު އިބްރާޙީމް މުޙައްމަދު (އިއްބެ ޖަނާބު) ވިދާޅުވެއްޖެއެވެ.

ސިނގިރޭޓާއި ދުންފަތުން ނަގައި ޓެކްސް ބޮޑުކޮށް، އީ-ސިނގިރޭޓު އަދި ވޭޕު މަނާކުރާގޮތަށް އެކްސްޕޯޓް އިންޕޯޓް ގާނޫނަށް މެންބަރު އިއްބެ އިސްލާޙް ހުށަހެޅުއްވުމާއި ގުޅިގެން ބައެއް ފަރާތްތަކުން ވަނީ، ޓެކްސް އަކީ ފޭރުން ކަމަށާ އެއީ ހަރާމް އެެއްޗެއް ކަމަށް އިއްބެ މީގެ ކުރިން ވިދާޅުވެފައިވާކަން ފާހަގަކޮށް ފާޑުކިޔާފައެވެ. 

އެވާހަކަ ތަކަށް ރައްދު ދެއްވައި އިއްބެ އެކްސްގައި ކުރެއްވި ޕޯސްޓެއްގައި ވިދާޅުވީ، ސިޔާސީ މައިދާނަށް ނުކުންނެވުމުގެ ކުރިންވެސް މުސްލިމުންގެ މުދަލުން ޢުޒުރެއްނެތި ޓެކްސް ނެގުން ފަދަ ކަންކަން ހުއްދަ ނުކުރައްވާ ކަމަށެވެ. 

Advertisement

އަދި މުސްލިމުންގެ މުދަލުން ޓެކްސް ނެގުމާމެދު އޭނާގެ ބަސް، ކުރިއެކޭ އެއްވެސް ތަފާތެއް ނުވާ ކަމަށާ، އެއީ ހުއްދަ ނޫން ކަމެއް ކަމަށް ވިދާޅުވިއެވެ. 

މިއާއެކު މެންބަރު އިއްބެ ވިދާޅުވީ، ފުރަންދާ ބޭރު މީހުންވެ އަތުން ޓެކްސް ނަގާތީ އެކަމާ ކަންބޮޑުވެގެން އުޅޭ ގިނަ މީހުންގެ އެއްވެސް އިޚްލާސްތެރި ކަމެއް ނެތް ކަމަށާ، އެފަދައިން ވާހަކަ ދައްކާ ފަރާތްތަކުގެ ޕާޓީ ތަކުގެ މެނިފެސްޓޯގައި  ރައްޔިތުންނަށްދޭ ޚިދުމަތުން ޓެކްސް ނެގުމާއި ޓެކްސް ބޮޑު ކުރުން ހިމެނޭ ކަމަށެވެ. 

އެހެންކަމުން، އެފަދަ ފަރާތްތަކުން ފުރަތަމަ ކުރަންވީ ކަމަކީ ޕާޓީގެ މެނިފެސްޓޯއާއި ދެކޮޅަށް ނުކުމެ ބަދަލު ކުރުން ކަމަށާ ރައްޔިތުން ގާތަށް އަންނަން ވާނީ އޭގެ ފަހުން ކަމަށް އިއްބެ ވިދާޅުވިއެވެ.