އާސަންދައިގެ ދަށުން އެންމެ ގިނައިން ދޫކުރާ ބޭހުގެ އަގުތައް އަންނަ މަހުން ފެށިގެން ކޮންޓްރޯލްކުރަން ފަށާނޭކަމަށް ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ބުނެފިއެވެ.
އެންސްޕާއިން ނެރެފައިވާ އިއުލާނެއްގައި ބުނެފައިވަނީ، އާސަންދައިގެ ދަށުން އެންމެގިނައިން ދޫކުރާ 250 ބޭހުގެ އަގަށް ބަދަލު ގެނައުމަށް ހަމަޖެހިފައިވާ ކަމަށާއި، މިގޮތުން އެ މަސައްކަތް ކުރިއަށްދާނީ އެކި ފިޔަވަހިތަކަށް ބަހާލައިގެންކަމަށެވެ.
މި ފިޔަވަޅުތަކުގެ ތެރެއިން އަގު މުރާޖައާ ކުރެވިފައިވާ 87 ބޭހުގެ އަގު އަންނަ ނޮވެމްބަރުމަހުގެ 1 ވަނަ ދުވަހުން ފެށިގެން ބަދަލު ގެނައުމަށް އެންސްޕާއިން ވަނީ ނިންމާފައެވެ. އަދި 126 ބޭހެއްގެ އަގުތައް ނޮވެމްބަރުމަހުގެ 24 ވަނަ ދުވަހުން ފެށިގެން ބަދަލު ގެނައުމަށް ނިންމާފައިވާކަމަށްވެސް އެންސްޕާއިން ބުނެއެވެ.
އެންސްޕާއިން ބުނީ އަގުތަކަށް ބަދަލުގެންނަ ބޭހުގެ ތަފްސީލްތައް އެ ބަދަލު ގެންނަ ދުވަހުން ފެށިގެން އާސަންދަ ކުންފުނީގެ ވެބްސައިޓުން ފެންނަން ހުންނާނޭ ކަމަށެވެ.
ބޭހުގެ އަގުތަކަށް ގެނައުމަށް ނިންމާފައިވާ މި ބަދަލާ ގުޅޭގޮތުން އެންސްޕާއިން ބުނީ، މި ފިޔަވަޅުތަކުގެ ސަބަބުން ކުރިން އަގުބޮޑުކޮށް ވިއްކަމުންދިޔަ ބޭސްތައް އަގުހެޔޮކުރެވި އާސަންދަ ސްކީމަށް ކުރަންޖެހޭ ހަރަދުތައްވެސް ކުޑަވެގެން ދާނޭކަމަށެވެ. އެންސްޕާއިން ބުނީ މި ފިޔަވަޅުތަކުގެ ސަބަބުން ދައުލަތުގެ ބައިތުލްމާލުން ބޭހަށް އަހަރަކަށް ކުރަމުން އަންނަ ހަރަދުތަކުން 220 މިލިއަން ރުފިޔާ ސަލާމަތްކުރެވޭނެ ކަމަށެވެ.
Advertisement
This content is created and paid for by advertisers and does not involve Voice Journalists
