އިންޑޮނީޝިއާގެ ހަނޑޫ މޫސުމުގެ ކުރިން އަތުވެދާނެ ސަޕްލައި ޗެއިން ޝޯޓޭޖަކަށް ތައްޔާރުވުމުގެ ގޮތުން އިންޑިއާއިން 1 މިލިއަން މެޓްރިކް ޓަނުގެ ހަނޑޫ އެތެރެކުރާނެކަމަށް އިންޑޮނީޝިއާގެ ކޯޑިނޭޓިންގ މިނިސްޓަރ ފޮރ ފުޑް އެފެއަރޒް ޒުލްކިފްލި ހަސަން ވިދާޅުވެއްޖެއެވެ.

މޫސޫމީ ބަދަލުތަކުގެ ސަބަބުންނާއި މިދިޔަ 2 އަހަރުގެ ހޫނު މޫސުމުގެ އަސަރުގެ ސަބަބުން އަންނަ އަހަރު އިންޑޮނީޝިއާގެ ދަނޑުވެރިން އުފައްދާ ހަނޑުލުގެ އަދަދު 2.3 އިންސައްތަ ދަށަށް ދާނެކަމަށް ބެލެވެއެވެ. ޑިސެމްބަރު މަހުން ފެށިގެން ފެބްރުއަރީ މަހުގެ ނިޔަލަށް ހަނޑު ލިބޭ މިންވަރު މަދުވާނެކަމަށް ބެލެވޭތީ، ފެބްރުއަރީ މަހުގެ ނިޔަލަށް ހަނޑޫ ސަޕްލައި މެދުކެނޑުނަ ނުދިނުމަށް އިންޑިއާއިން ގެންދާ 1 މިލިއަން މެޓްރިކް ޓަނުން އެހީވާނެކަމަށް އިންޑޮނީޝިއާގެ ފުޑް އެޖެންސީއިން ބުނެއެވެ. ހަނޑޫ މޫސުން އިންޑޮނީޝިއާގައި ފެށޭނީ މާޗް މަހުގެ މެދުތެރެއިން ފެށިގެންނެވެ.

280 މިލިއަން މީހުންގެ އާބާދީގެ އިންޑޮނީޝިއާގެ މީހުންގެ ކެއުމުގައި ހަނޑުލަކީ އެންމެ މުހިއްމު އެއް ބައެވެ. އިންޑިއާއިން އެތެރެކުރާ ހަނޑުލާއެކު، ޖުމްލަ 3.6 މިލިއަން މެޓްރިކް ޓަނުގެ ހަނޑޫ އެގައުމުން މިއަހަރު އެތެރެކުރާނެއެވެ. އަދި ހަނޑޫ ހޯދުމަށް އެހެން ގައުމުތަކަށް ބަރޯސާވުން ކުޑަކުރުމަށް ރައީސް ޕްރަބޯވޯ ސުބިއަންޓޯ ވެވަޑައިގެންފައިވާ ވައުދާއެކު އަންނަ އަހަރު މިލއަން ހެކްޓަރާއި ގާތްކުރާ އަދަދަކަށް ހަނޑޫ ދަނޑު ހައްދަން ބިން ދޫކުރާނެއެވެ.

Advertisement

މިދިޔަ އަހަރު ހަނޑޫ އެކްސްޕޯޓްކުރުން މަނާކުރުމާ ގުޅިގެން އިންޑިއާގެ ހަނޑުލުގެ ސްޓޮކް ރަނގަޅުވެ، އަންނަ އަހަރު ބޮޑު އަދަދެއްގެ ހަނޑު ޝިޕްމަންޓްތައް ބޭރުކުރެވޭނެކަމަށް އިންޑިއާއިން އަންދާޒާކުރެއެވެ.