ކުރިއަށް އޮތް އަހަރަށް ލަފާކުރާ ދައުލަތުގެ ބަޖެޓް ބަޔާން ރައްޔިތުންގެ މަޖިލީހަށް ހުށަހެޅުނުއިރު، އަދިވެސް މެމްބަރުންނަށް ބަޖެޓް ފޮތް ލިބިފައިނުވާކަމަށް ބުނެ، އެމްޑީޕީ ޕާލިމަންޓަރީ ގްރޫޕުން ކަންބޮޑުވުން ފާޅުކޮށްފިއެވެ.

އިދިކޮޅު އެންމެބޮޑު ޕާޓީ، އެމްޑީޕީން މިއަދު މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ހދ. ހަނިމާދޫ އަބްދުލްޣަފޫރު މޫސާ (ގަޕޯ) ވިދާޅުވީ، މަޖިލީހުގައި މި ފަހުން ހޭދަކުރި އަހަރުތަކަށް ބަލާއިރު ބަޖެޓް ފޮތް ނުލިބި، ބަޖެޓް ހުށަހަޅާފައި ނުވާކަމަށެވެ. 

ސަރުކާރުން ވަނީ އަންނަ އަހަރަށް ލަފާކުރާ ދައުލަތުގެ ބަޖެޓް، މިހިނގާ ނޮވެމްބަރުމަހުގެ 1 ވަނަ ދުވަހު ރައްޔިތުންގެ މަޖިލީހަށް ހުށަހަޅާފައެވެ. ބަޖެޓް މަޖިލީހަށް ހުށަހަޅުއްވައިދެއްވީ މާލީ ވަޒީރު މޫސާ ޒަމީރެވެ.

Advertisement

ބަޖެޓް ފޮތް ނުލިބޭ މައްސަލާގައި ވާހަކަދައްކަވަމުން ގަޕޯ ވިދާޅުވީ، މިއަދާ ހިސާބަށް އާއިރުވެސް ބަޖެޓްފޮތް ލިބިފައިނުވާ ކަމަށާއި، ބަޖެޓްފޮތް ނުލިބި، ބަޖެޓާ ގުޅޭގޮތުން ދެންހުރި ނިންމުންތައް ނިންމަން އުނދަގޫވާނެކަމަށެވެ.

ގަޕޯ ވިދާޅުވީ ބަޖެޓް ހުށަހަޅަން ޖެހޭނީ ގާނޫނުގައިވާ ގޮތުގެ މަތިން ކަމަށާއި، ސަރުކާރުން ބަޖެޓް ހުށަހަޅާފައިވަނީ ޤާނޫނާ ހިލާފަށްކަމަށެވެ. ކައުންސިލްތަކަށް ބަޖެޓް ދޭންޖެހޭ މިންގަނޑެއް ބަޔާންކޮށްފައިވާއިރު، ކައުންސިލްތަކަށް ބަޖެޓް ކަނޑައަޅާފައިވަނީ ޤާނޫނުގައި ބުނާ މިންގަނޑަށް ނޫންކަމަށްވެސް ގަޕޯ ފާހަގަކުރެއްވިއެވެ. 

ސަރުކާރުން ކައުންސިލްތަކަށް ދޭންޖެހޭ ބަޖެޓް 30 އިންސައްތަ އުނިކޮށްފައިވާކަމަށް ތުހުމަތުކުރައްވަމުން ގަޕޯ ވިދާޅުވީ، އެހެން ދިމަދިމާލުން ފައިސާދީގެން އެކަން ކުރުމަކީ ކުރެވޭނޭ ހަމައެއް ނޫންކަމަށާއި، ކައުންސިލްތަކަށް ފައިސާ ދޭ އަދަދު ކަނޑައަޅަންޖެހޭނީ ސީދާ ރަސްމީ ބަޖެޓުގެ ތެރެއިންކަމަށެވެ. 

ނިމިގެންދާ އަހަރު ހަރަދުކުރިގޮތްވެސް އެނގެން އަންނަނީ ބަޖެޓް ފޮތް ލިބިގެން ކަމަށާއި، ބަޖެތްފޮތް ނުދީ ސަރުކާރުން ކަންތައްތަކެއް ފޮރުވަން އުޅޭކަން ގަޕޯ ވަނީ ފާހަގަކުރައްވާފައެވެ. ގަޕޯގެ އިތުރުން ނޫސްވެރިންގެ ބައްދަލުވުމުގައި ވާހަކަ ދެއްކެވި އެމްޑީޕީގެ އިތުރު މެމްބަރުންވެސް ވަނީ ބަޖެޓްގެ ކަންކަމުގައި ސަރުކާރުން އޮޅުވާލުންތަކެއް ގެންގުޅޭކަން ތުހުމަތުކުރައްވާފައެވެ.

ބަޖެޓް ފޮތުގެ މައްސަލައާ ގުޅޭގޮތުން ވޮއިސް އިން ފިނޭންސް މިނިސްޓްރީގެ އޮފިޝަލަކާ ގުޅާލުމުން ވިދާޅުވީ މިއަދުގެ ވަގުތެއްގައި ބަޖެޓް ފޮތް ނެރޭނޭ ކަމަށެވެ.

ސަރުކާރުން ވަނީ ކުރިއަށްއޮތް 2025 ވަނަ އަހަރަށް 56.6 ބިލިއަން ރުފިޔާގެ ބަޖެޓެއް މަޖިލީހަށް ހުށަހަޅުއްވާފައެވެ. ބަޖެޓުގެ ޖުމުލަ ޚަރަދަކީ 49.2 ބިލިއަން ރުފިޔާއެވެ. އެއީ، ރިކަރަންޓް ޚަރަދުގެ ގޮތުގައި 35.9 ބިލިއަން ރުފިޔާއާއި ކެޕިޓަލް ޚަރަދުގެ ގޮތުގައި 13.3 ބިލިއަން ރުފިޔާއެވެ. އަންނަ އަހަރުގެ ޖުމުލަ އާމްދަނީއާއި ހިލޭ އެހީ 39.8 ބިލިއަން ރުފިޔާއަށް އަރާނެ ކަމަށްވަނީ އަންދާޒާކޮށްފައެވެ. އެއީ، ހިލޭ އެހީގެ ގޮތުގައި 2.5 ބިލިއަން ރުފިޔާ ހިމަނައިގެންނެވެ.