ފީފާއިން އިންތިޒާމްކުރި ބައިނަލްއަޤްވާމީ ރަހުމަތްތެރިކަމުގެ މެޗެއްގައި އިއްޔެ ބަންގާޅުއަތުން ލިބުނު މޮޅަކީ، މިހާލަތުގައި ފުޓްބޯޅައަށް ބޭނުންވި އުއްމީދެއްގެ ފެށުންކަމަށް ރާއްޖޭގެ ޤައުމީޓީމުގެ ކުރީގެ އެއްވަނަ ފޯވާޑް އަލީ ޝިހާމް ބުނެފިއެވެ.

ވޮއިސްއާ ވާހަކަދައްކަމުން ގަލޮޅުދަނޑުން ފެނުނު އެންމެ އަހުލާގު ރަނގަޅުކަމަށް ގިނަ ބަޔަކު ފާހަގަކުރާ، ހުރާ އައްޔަ ބުނީ، ރާއްޖޭގެ ފުޓްބޯޅަ އާމެދު ސަޕޯޓަރުން މާޔޫސްވެފައި ތިއްބައި ޤައުމީ ޓީމް ބަންގްލަދޭޝްއަތުން މޮޅުވި މޮޅުވުމަކީ މިވަގުތަށް ކޮންމެހެންވެސް ބޭނުންވި އަދި ލިބިގެންދިޔަ ވަރަށް ރަނގަޅު ނަތީޖާއެއް ކަމަށެވެ. 

ބަންގްލަދޭޝްގައި ކުޅުނު މިމެޗް ރާއްޖޭގެ ޓީމް ކާމިޔާބުކުރީ އެކެއް ސުމެއްގެ ނަތީޖާއަކުންނެވެ. މެޗްގެ ނަތީޖާއާ ގުޅޭގޮތުން އައްޔަ ބުނީ، މެޗަކުން މޮޅުވުމަކީ ސަޕޯޓަރުން އެންމެ ބޭނުންވާ ކަންތައްކަމަށާއި، ކޮންމެ މޮޅަކާއެކު ޓީމަށް ސަޕޯޓްކުރާ މީހުން އިތުރުވެގެންދާނޭ ކަމަށެވެ. އުއްމީދަކީ މި ފެށުން ރަނގަޅަށްގޮސް ރާއްޖޭގެ ފުޓްބޯޅަ އިހުއޮތް ހާލަތަށް ދިއުންކަމަށް އުފަންރަށަށް ނިސްބަތްވާ ހުއްރިއްޔާގެ އިތުރުން ވެލެންސިއާ އާއި ނިއުރޭޑިއަންޓަށް ކުޅެ ރާއްޖޭގެ މޮޅު ކުޅުންތެރިޔާގެ މަގާމާއި އެންމެގިނަ ގޯލް ޖަހައިގެން ރަންބޫޓް ކާމިޔާބުކުރި އައްޔަ ބުންޏެވެ.

ބަންގާޅުގައި ކުޅުނު މެޗުން ރާއްޖެ މޮޅުވިއިރު، މިއީ އެޤައުމުގައި ކުޅެގެން ރާއްޖެއަށް މޮޅެއް ލިބުނު ފުރަތަމަ ފަހަރެވެ. ސާކް ސަރަހައްދަށް ނިސްބަތްވާ ޓީމްތަކުގެ ތެރެއިން ބަންގްލަދޭޝް އަކީ ރާއްޖެއަށް ބަލިކުރަން އުނދަގޫ ޓީމެކެވެ. އިްއޔެގެ މެޗްގައި ފެނިގެންދިޔަ ހަމައެކަނި ގޯލް ރާއްޖެއަށް ކާމިޔާބުކޮށްދިނީ،  އަލީ ފާސިރު (ސެންޓޭ) އެވެ.

ބަންގާޅުއަތުން މޮޅުވި މެޗަށްފަހު ބޭއްވި ނޫސްވެރިްނގެ ބައްދަލުވުމުގައި ރާއްޖޭގެ ގައުމީޓީމުގެ ކޯޗް އަލީ ސުޒޭން ވެސް ވަނީ ލިބުނު މޮޅަކީ ތާރީހީ މޮޅެއްކަން ފާހަގަކޮށްފައެވެ.