ޖަލުގައި ބަހައްޓައިގެން ހުކުމް ތަންފީޒު ކުރަމުންދިޔަ ހއ.ހޯރަފުށީ އަންދަލީބުގެ ހާޝިމް އަބޫބަކުރު ގެއަށް ބަދަލުކުރީ ބަލިހާލަތު ހުރިގޮތުން، ޖަލުގައި ބަހައްޓައިގެން ފަރުވާ ނުދެވޭނެތީކަމަށް މޯލްޑިވްސް ކަރެކްޝަނަލް ސަރވިސްއިން ބުނެފިއެވެ.

ސޯޝަލް މީޑިއާގައި ދައުރުވަމުންދާ ވާހަކަތަކާ ގުޅޭގޮތުން، ކަރެކްޝަނުން ނެރުނު ބަޔާނެއްގައި ބުނީ، އުމުރުން 57 އަހަރުގެ ހާޝިމް އަކީ 2022 ވަނަ އަހަރުން ފެށިގެން ޖަލުގައި ހުކުމް ތަންފީޒުކުކުރުމަށް ޖަލަށް ލާފައިހުރި މީހެއްކަމަށެވެ. އޭރުވެސް ހާޝިމް އައީ އުނަގަނޑުގެ މައްސަލައެއް ހުރެ އެކަމުގެ ވޭން ތަހައްމަލުކުރަމުން ކަމަށާއި، އޭނާގެ ސާޖަރީ ރާއްޖޭން ކުރެވެން ނެތުމުން މެޑިކަލް ބޯޑުގެ ލަފާގެ މަތިން އޮގަސްޓްމަހުގެ 5 ވަނަ ދުވަހު ރާއްޖެއިން ބޭރަށް ބޭސްފަރުވާކުރުމުގެ ހުއްދަ ދީފައިވާކަމަށެވެ.

ރާއްޖެއިން ބޭރުން ބޭސްފަރުވާ ހޯދުމަށްފަހު ސެޕްޓެމްބަރުމަހުގެ 16 ވަނަ ދުވަހު ހާޝިމް ރާއްޖެ އައިކަން ފާހަގަކުރަމުން ކަރެކްޝަނުން ބުނީ ބަލިހާލަތު ހުރިގޮތުން، ޑޮކްޓަރު ލަފާގެމަތިން ޖަލުގައި ބަހައްޓައިގެން ބޭސްފަރުވާ ނުދެވޭނެތީވެ، އޭނާ ވަނީ ހުކުމް ތަންފީޒުކުރުމަށް ވަގުތީގޮތުން ގޭބަންދުގައި ބަހައްޓާފައިކަމަށެވެ. މިގޮތުން އޮންނަ އުސޫލުގެ ދަށުން ހާޝިމްގެ ކަންކަން މޮނީޓަރކޮށް ބަލަހައްޓަމުންދާކަމަށްވެސް ކަރެކްޝަނަލް ސަރވިސް އިން ބުނެއެވެ.

ހާޝިމް އަކީ އިތުބާރުކުރެވޭ މަޤާމެއްގައިހުރެ ކުޑަކުއްޖަކާމެދު ޖިންސީ ޢަމަލު ހިންގުމުގެ ކުށުގައި ހުކުމް ތަންފީޒުކުރަމުންދާ މީހެކެވެ.