ކުރީ ސަރުކާރުގައި، އިންތިޚާބު ތަކަށް ޓާގެޓްކޮށް، ކޮންސްޓްރަކްޝަން މިނިސްޓްރީގައި އެކަނިވެސް 39 ބިލިއަން ރުފިޔާގެ މަޝްރޫއު ސޮއިކޮށްފައި އެބަހުރި ކަމަށް މިނިސްޓަރު ޑރ. އަބްދުالله މުއްތަލިބް މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު މުއްތަލިބް ވަނީ އެއީ ދައުލަތުގެ އެއްވެސް ބަޖެޓަކުން ކުރެވޭ އަދަދެއްގެ މަސައްކަތްތަކެއް ނޫން ކަމަށް ވިދާޅުވެފަ އެވެ.
"39 ބިލިއަން ރުފިޔާ އަޅުގަނޑުމެންނަށް އާމްދަނީގެ ގޮތުގައިވެސް ނުލިބޭ އަހަރެއްގެ ތެރޭގައި،" މުއްތަލިބް ވިދާޅުވި އެވެ.
މިނިސްޓަރ އިތުރަށް ވިދާޅުވީ، ނިމިދިޔަ 2023 ވަނައަހަރުގެ ރިޔާސީ އިންތިޚާބާއި، މަޖިލިސް އިންތިޚާބަށް އަމާޒުކޮށްވެސް ގިނަ މަޝްރޫޢުތަކެއް ކުރީ ސަރުކާރުން ބަޖެޓުގައި ހިމަނާފައި ހުރި ކަމަށެވެ. އެހެން ނަމަވެސް، އެ ބަޖެޓުގައި ހުރީ ކޮންމެ ރަށަކަށް "އެތިކޮޅެއް" ދޭ ގޮތަށް ކަމަށާ، އެގޮތަށް އަދަދުތައް ޖެހުމުން މަޝްރޫއުތައް ކުރިއަށް ނުދާނެ ކަމަށް މިނިސްޓަރު ވިދާޅުވި އެވެ.
ކޮންމެ ރަށެއްގައިވެސް، މަޖިލިސް އިންތިޚާބަށް ޓާގެޓްކޮށް މަޝްރޫޢުތައް ޖަހާފައި އެބަ ހުރި. މިދެންނެވީ ސޮއިކޮށްފައި އެކަނިވެސް 39 ބިލިއަން ރުފިޔާ. ދެން ކިހިނެއްތޯ އައު، މަޝްރޫޢުތަކެއް ފަށާނީ؟ ކޮންތާކު ހުރި ފައިސާއަކުންތޯ؟ އެއް ލައްކަ ރުފިޔާ ޖަހާފައި އެބަހުރި މަސައްކަތެއް ފަށަން.. 2 ލައްކަ ޖަހާފައި މިހުންނަނީ މަސައްކަތެއް ފަށަން. އެހެންވީމާ އެ މަސައްކަތް ފެށޭވަރަށް ފައިސާ ހިމަނާފައި ނެތީމާ، އަޅުގަނޑުމެންނަށް މަސައްކަތެއް ނުފެށޭ.
މިނިސްޓަރު ޑރ. އަބްދުالله މުއްތަލިބް
ކަންމިހެން ހުރުމުން، 2025 ވަނަ އަހަރުގެ ބަޖެޓު ފަރުމާ ކުރެވުނީ އެހުރިހާ ކަމަކަށް ބަލައިގެން ކަމަށާ، ފުރުސަތު ލިބުނު ވަރަކުން ހުރިހާ މަޝްރޫއުއެއްވެސް ކުރިއަށް ގެންދަވާނެ ކަމަށް ވަޒީރު ވިދާޅުވުއެވެ.
"2025 ވަނަ އަހަރުގެ ބަޖެޓު އަޅުގަނޑުމެން ހަދާފަ އެ އޮތީ މި ދެންނެވި ގޮތަށް އެންވެލޮޕެއްގެ ތެރެއިން މަޝްރޫއުތައް ކުރިއަށް ގެންދެވޭ ގޮތަށް އެހެންވީމަ އަޅުގަނޑުމެންނަށް ކުރިއަށްގެންދަން ފުރުސަތު ލިބޭވަރަކަށް ހުރިހާ މަޝްރޫއެއްވެސް ކުރިއަށް ގެންދާ ގޮތަށް،" މިނިސްޓަރު މުއްތަލިބް ވިދާޅުވި އެވެ.
ދައުލަތުގެ އަންނަ އަހަރުގެ ބަޖެޓުގެ ގޮތުގައި މިދިޔަ އޮކްޓޫބަރު 31 ވަނަ ދުވަހު ރައްޔިތުންގެ މަޖިލީހަށް ހުށަހަޅާފައިވަނީ 56.6 ބިލިއަން ރުފިޔާގެ ބަޖެޓެކެވެ.
Advertisement
This content is created and paid for by advertisers and does not involve Voice Journalists
