ޒުވާނުންގެ މެދުގައި ދީނީ ހޭލުންތެރިކަން އިތުރުކޮށް، الله ގެ ޙައްޤުތަކަށް ރައްކާތެރިވާނެ ޖީލެއް އުފެއްދުމުގެ މަޤްޞަދުގައި އަލްޢަސްރު ޖަމްޢިއްޔާއިން "އައްޑަނަ" ނަމުގައި ޚާއްޞަ ވޯކްޝޮޕެއް މިރޭ ފެށޭނެ ކަމަށް އެ ޖަމިއްޔާއިން ބުނެފިއެވެ.

މި ވޯކްޝޮޕް އަމާޒުކުރެވިފައިވަނީ 15 އަހަރާއި 20 އަހަރާ ދެމެދުގެ ޒުވާނުންނަށެވެ. ވޯކްޝޮޕް ކުރިއަށްދާނީ 28 ނޮވެމްބަރުން 30 ނޮވެމްބަރަށް، މޯލްޑިވްސް އިސްލާމިކް ޔުނިވަރސިޓީ (އައިޔޫއެމް) ގައެވެ. އެގޮތުން، ވޯކްޝޮޕްގެ ފުރަތަމަ ސެޝަންއޮންނާނީ މިރޭ 20:00 ގައެވެ. 

އަލްޢަސްރުގެ ފަރާތުން މަޢުލޫމާތު ދިން ގޮތުގައި މި ވޯކްޝޮޕްގެ މައިގަނޑު މަޤްޞަދަކީ الله ސުބްޙާނަހޫ ވަތަޢާލާގެ ޙައްޤުތަކަށް ރައްކާތެރިވާ ޒުވާން ޖީލެއް ބިނާކުރުމެވެ. އަދި މި ވޯކްޝޮޕަކީ ދީނާމެދު ފުންކޮށް ވިސްނާލުމުގެ ފުރުޞަތު ޒުވާނުންނަށް ހޯދައިދިނުމަށާއި، އަމިއްލަ ޢަޤީދާއާމެދު އުފެދޭ ސުވާލުތަކަށް ޖަވާބު ހޯދައިދިނުމަށް ތައްޔާރުކުރެވިފައިވާ ވޯކްޝޮޕެއް ކަމަށެވެ.

"އައްޑަނަ" ވޯކްޝޮޕްގެ ޚާއްޞަ ކަމެއްގެ ގޮތުގައި ފާހަގަކުރެވެނީ މިއީ އާންމު ވޯކްޝޮޕްތަކާ ތަފާތު، ޒުވާނުންނާ ގުޅޭ މަޖާ އަދި އިންޓަރެކްޓިވް މާޙައުލެއްގައި ދީން ދެނެގަތުމަށް މަގުފަހިކޮށްދޭ ވޯކްޝޮޕަކަށް ވުމެވެ. މި ވޯކްޝޮޕްގެ ސެޝަންތައް ކުރިއަށް ގެންދަނީ ބައިވެރިންގެ ޢަމަލީ ބައިވެރިވުމާއެކު، މަލްޓިމީޑިއާ ޕްރެޒެންޓޭޝަންތަކާއި މި ޒަމާނުގެ މައްސަލަތަކާ ގުޅޭގޮތުން މަޝްވަރާކުރުމުގެ ފުރުޞަތު ދެވިގެންނެވެ.

ވޯކްޝޮޕްގެ މުހިންމު ބައިތަކުގެ ތެރޭގައި އިސްލާމީ ޢަޤީދާ ފަހުމުކޮށްދިނުމާއި، ސޯޝަލް މީޑިއާގެ ޒަމާނުގައި އީމާންތެރިކަން ދަމަހައްޓާނެ ގޮތްތައް ދަސްކޮށްދިނުން ހިމެނެއެވެ. އަދި ދީނުގައި ކްރިޓިކަލް ތިންކިންގ ގެންގުޅެންވީ އުސޫލުތައްވެސް ކިޔައިދެއެވެ.

ވޯކްޝޮޕްގެ މައިގަނޑު ނުކުތާތައް ކަމުގައިވާ ތައުޙީދު، އަލްވަލާ ވަލްބަރާ، އަދި ޝިރުކު ފަދަ ޝަރުޢީ މައުޟޫޢުތައް ކިޔަވައިދެއްވާނީ މަދީނާ ޔުނިވަރސިޓީގެ ދެ ގްރެޖުއޭޓުން ކަމަށްވާ އައްޝައިޚް މުޙައްމަދު ސާޖިދުއާއި އައްޝައިޚް ޙަސަން ފައިޞަލްއެވެ.

މި ވޯކްޝޮޕްގައި ބައިވެރިވުމަށް ޝައުޤުވެރިވާ ފަރާތްތަކުން ނަން، އުމުރު، ގުޅޭނެ ނަންބަރު އަދި އީމެއިލް އެޑްރެސް ހިމަނައި 7925277 ނަންބަރަށް އެސްއެމްއެސް ނުވަތަ ވައިބަރ މެސެޖެއް ފޮނުވުމަށް އަލްޢަސްރުން އެދިފައިވެއެވެ. އަދި މި ވޯކްޝޮޕަކީ ހިލޭ ބައިވެރިވެވޭ ވޯކްޝޮޕެއްކަމަށާ ވޯކްޝޮޕްގައި ބައިވެރި ވުމުގެ ފުރުސަތު މިހާރުވެސް ހުޅުވާލެވިފައިވާ ކަމަށް ފާހަގަކޮށްފައިވެއެވެ.

އަލްޢަސްރުން އިތުރަށް ބުނި ގޮތުގައި މި ވޯކްޝޮޕަކީ ހަމައެކަނި ލެކްޗަރ އަޑުއެހުމުގެ ބަދަލުގައި ވަރަށް އެންގޭޖިންގ އަދި ޒަމާނީ އުސްލޫބަކުން ކުރިއަށްގެންދެވޭ ވޯކްޝޮޕެކެވެ. މީގެ ސަބަބުން ބައިވެރިންނަށް އެމީހުންގެ އަމިއްލަ ނަފްސަށް ތަފާތު ގެނުވާނެ މަޢުލޫމާތު ލިބި، އެއް އުމުރުފުރައިގެ އެހެން ޒުވާނުންނާ ބައްދަލުވެ، ޢަޤީދާއާ ގުޅޭ ސުވާލުތަކާމެދު މަޝްވަރާކުރުމުގެ ފުރުޞަތު ލިބިގެންދާނެ ކަމަށެވެ.

އަލް އަސްރުގެ ފަރާތުން މައުލޫމާތު ދެއްވަމުން ގައުމީ ފުޓުބޯޅަޓީމުގެ ކުރީގެ ކެޕްޓަން އަކްރަމް އަބްދުލް ޣަނީ ވިދާޅުވީ، މި ވޯކްޝޮޕްގެ ސަބަބުން ޒުވާނުންގެ މެދުގައި ދީނީ ހޭލުންތެރިކަން އިތުރުވެ، الله ގެ ޙައްޤުތަކަށް ރައްކާތެރިވާ ޖީލެއް އުފެއްދުމަށް މަގުފަހިވެގެންދާނެ ކަމަށެވެ.

އަދި އޭނާ ވަނީ ވީހާވެސް ގިނަ ޒުވާނުން މި ވޯކްޝޮޕްގައި ބައިވެރިވުމަށް އެދިލައްވާފައެވެ.