ގެއަކުން ވައްކަންކުރަން އުޅުނު މީހަކު ހައްޔަރުކުރަން ދިޔުމުން ފުލުހުންނަށް ފިލަން ގޭގެ އަލަމާރި ތެރެއަށް ވަދެ، ބޮލުގައި ކަޅު ކޮތަޅެއް އަޅައިގެން ހުރި ކަމަށް ފުލުހުން ބުނެފިއެވެ.

މި މައްސަލައިގައި ތުހުމަތު ކުރެވެނީ 33 އަހަރުގެ ދިވެހި ފިރިހެނަކަށެވެ. އެމީހާ ހައްޔަރު ކުރުމަށްފަހު ބަންދާމެދު ގޮތެއް ނިންމަން ކްރިމިނަލް ކޯޓަށް ހާޒިރު ކުރުމުން އެ ކޯޓުން ވަނީ ބަންދަށް 15 ދުވަސް ޖަހައިފައެވެ.

އޭނާ ހައްޔަރުކޮށްފައިވަނީ ދަންވަރުގެ ވަގުތެއްގައި މާލޭގެ ގެއަކަށް ވަދެ، ވައްކަންކުރަން އުޅުމުގެ ތުހުމަތުގައި ކަމަށް ބަންދު އަމުރުގައި ވެއެވެ.

Advertisement

އެގޮތުން، އެ މީހާ ގެއަށް ވަންނަ މަންޒަރާއި ގޭތެރޭގައި ހަރަކާތްތެރިވާ މަންޒަރު ފެންނަ ސީސީޓީވީ ފުޓޭޖު ފުލުހުންގެ ފަރާތުން ހުށަހަޅާފައިވާއިރު، އެ ގެއިން އަގު ބޮޑު ދެ ފޯނު ވަގަށް ނެގި ކަމަށް ފުލުހުން ތުހުމަތު ކުރެއެވެ.

އަދި ކޯޓު އަމުރެއްގެ ދަށުން އެ މީހާ ހައްޔަރުކުރަން ފުލުހުން ދިއުމުން އެ މީހާ އެ ވަގުތު ހުރި ގޭގެ އަލަމާރި ތެރެއަށް ވަދެ، ބޮލުގައި ކަޅު ކޮތަޅެއް އަޅައިގެން ފުލުހުންނަށް ފިލަން މަސައްކަތްކުރި ކަމަށް ވެސް ފުލުހުން ބުނި ކަމަށް ކޯޓު އަމުރުގައިވެއެވެ.

މީގެ އިތުރުން ކޯޓު އަމުރުގައި ބުނީ، އެ މީހާ ތަހުގީގަށް ހާޒިރުކުރުމުން ހަނުހުރީ މައްސަލަ ބެއްލެވި ފުލުސް އޮފިސަރު "އަވަސް ކޮށްލާށޭ.. ހަނު ބަޔާނެއް ދޭށޭ،" ބުނުމުން ކަމަށް އޭނާ ބުނި ކަމަށެވެ. އެހެންވެ، ޝަރީއަތުގެ މަޖިލީހުގައި ވެސް އޭނާ ދިފާއަށް އެއްވެސް އެއްޗެއް ބުނެފަ ނުވާ ކަމަށް އަމުރުގައި ވެއެވެ.

މި މީހާގެ ބަންދު އަމުރުގައިވާ ގޮތުން، މި ބާވަތުގެ 45 މައްސަލައެއްގައި މީގެ ކުރިން ވެސް އެ މީހާ ހައްޔަރުކޮށްފައިވެއެވެ. އަދި އޭގެ ތެރެއިން 27 ފަހަރު ބަންދުކޮށް މުއްދަތު ވެސް ޖަހާފައިވެއެވެ.