މ.މުލަކުގައި ފަތުރުވެރިކަމުގެ ދާއިރާއިން މީހުން ބިނާކުރާނެ މަރުކަޒެއް ގާއިމުކުރުމަށް ބިން ދޫކުރުމަށް އެރަށު ކައުންސިލުން ހުޅުވާލައިފިއެވެ.

މުލަކު ކައުންސިލުން ކުރި އިއުލާނެއްގައި ބުނީ، މުލަކުގައި ފަތުރުވެރިކަމުގެ ތަޢުލީމާއި، ހުނަރާއި، ފަންނުތަކުގެ ދާއިރާއިން މީހުން ބިނާކުރާނެ މަރުކަޒެއް ޤާއިމުކުރުމަށް އެރަށުގެ ހުޅަނގު އުތުރު ފަޅިން، މ. މުލަކު ކައުންސިލުގެ ނަމުގައިވާ 53،000 އަކަފޫޓުގެ ބިން، ކުއްޔަށްދޫކުރުމަށް ނިންމާފައިވާކަމަށެވެ.

އެހެންކަމުން، އެކަމަށް ޝަޢުޤުވެރިވެލައްވާ ފަރާތްތަކުން އެކަމަށް އެދި ބީލަން ހުށަހެޅުމުގެ ފުރުޞަތު މުލަކު ކައުންސިލުން ވަނީ ހުޅުވާލާފައެވެ.

މުލަކު ކައުންސިލުން ބުނީ، ބީލަން ހުޅުވާލެވިފައި ވަނީ، ދިވެހި ރާއްޖޭގައި ވިޔަފާރި ރަޖިސްޓަރީ ކުރުމުގެ ޤާނޫނުގެ 4 ވަނަ މާއްދާގައި ބަޔާންކޮށްފައިވާ ގޮތުގެމަތިން، މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް ގައި ވިޔަފާރި ރަޖިސްޓަރީ ކުރެވިފައިވާ ފަރާތްތަކަށް ކަމަށެވެ.

ލަން ފޯމްގެ އަގަކީ 3،000 ރުފިޔާއަށް ވާއިރު، މި ބީލަމުގައި ރަޖިސްޓަރީވުމަށް އެދޭ ފަރާތްތަކުން 2024 ނޮވެންބަރު 27 ން 2024 ޑިސެންބަރު 05 ގެ 13:00ގެ ނިޔަލަށް ބީލަން ރަޖިސްޓްރީ ފޯމް ނަންގަވާ، "ބީލަން ރަޖިސްޓްރީ ފޯމް" ފުރިހަމަ ކުރުމަށް އެ ކައުންސިލުން ވަނީ އެދިފައެވެ.

ބީލަން ހުށަހެޅުމާއި، ބީލަން ހުޅުވުން އޮންނާނީ، 2024 ޑިސެންބަރު 12 ވަނަ ދުވަހުގެ 13:00ގައި، މުލަކު ކައުންސިލު އިދާރާގެ ޖަލްސާކުރާ މާލަމުގައި ކަމަށް އެއިދާރާއިން މައުލޫމާތުދެއެވެ.

މި ބިން ދޫކުރަން ހަމަޖެހިފައިވަނީ 50 އަހަރުގެ މުއްދަތަކަށްކަމަށާއި، މި އިމާރާތް 18 މަސްދުވަހުގެ ތެރޭގައި އަޅައި ނިންމަންޖެހޭނެކަމަށް ކައުންސިލުން ވަނީ ބުނެފައެވެ.

މުލަކު ކައުންސިލުން އިތުރަށް ބުނި ގޮތުގައި، ޕްރޮޕޯސަލް ހުށައަޅާއިރު ސީއެސްއާރުގެ ގޮތުގައި ކައުންސިލަށް ކޮށްދިނުމަށް ހުށައަޅާ ކަންކަމާއި، ތައުލީމީ ދާއިރާ އަދި އިޖްތިމާޢީ ދާއިރާއިން ކުރާނެ ކަންކަން ހިމަނަން ޖެހޭނެއެވެ.