ހދ. ނޮޅިވަރަމުގައި ދީނީ އިޖުތިމާއީ ހަރަކާތްތައް ހިންގާ ޖަމްޢިއްޔާއެއް ކަމަށްވާ ޖަމްޢިއްޔަތުއްރިސާލާއިން އިންތިޒާމުކޮށްގެން ބާއްވާ "އަޖަލު މާ ގާތޭ އިނގޭ" ދަރުސް މިރޭ ބޭއްވުމަށް ހަމަޖެހިއްޖެއެވެ.
ރާއްޖޭގެ ފުންނާބު އުސް ދީނީ ޢިލްމުވެރިޔާ ޑރ. އާދަމް ޝަމީމް ދެއްވާ މި ދަރުސް އޮންނާނީ، މިރޭ 20:30 ގައި ނޮޅިވަރަމު ބަނދަރުގައެވެ.
ޖަމްޢިއްޔަތުއްރިސާލާގެ ރައީސް ޢަލީ އަސްލަމް މަޢުލޫމާތު ދެއްވި ގޮތުގައި މި ދަރުހުގެ މައިގަނޑު މަޤްޞަދަކީ ރާއްޖޭގައި ފަހަކަށް އައިސް ހިނގާފައިވާ ބައެއް ހިތާމަވެރި ހާދިސާތަކުން އިބުރަތް ހާސިލުކޮށް، މަރަކީ ކޮންމެ ވަގުތެއްގައިވެސް ދިމާވެދާނެ ކަމެއްކަން ހަނދާންކޮށްދިނުމެވެ.
"މުސްކުޅިން، ޒުވާނުން، އަންހެނުން، ފިރިހެނުން، ކުޑަކުދިން، މި ހުރިހާ ބަޔަކަށްވެސް ކޮންމެ ވަގުތަކު މަރާ ކުރިމަތިލާން ޖެހިދާނެ. އެހެންވީމާ، އަޅުގަނޑުމެން ބޭނުންވަނީ މި ހަޤީޤަތް ހަނދާންކޮށްދީ، އިސްލާމްދީނުގެ ތެދުމަގަށް ރުޖޫޢަވުމަށް ބާރުއެޅުމަށް," ޢަލީ އަސްލަމް ވިދާޅުވިއެވެ.
މި ދަރުސް ދާރިސް ޓީވީއިން ލައިވްކޮށް ދައްކާނެ ކަމަށް ޖަމްޢިއްޔަތުއްރިސާލާއިން މަޢުލޫމާތު ދެއެވެ. މީގެ އިތުރުން، ކައިރި ރަށްރަށުން އެކަށީގެންވާ ތަރުހީބެއް ލިބޭނަމަ، ދަރުހަށް ދިއުމަށް ޚާއްޞަ ފެރީ ދަތުރުތަކެއް ބޭއްވުމަށް ގަސްތުކުރާ ކަމަށްވެސް ޖަމްޢިއްޔާއިން ބުނެފައިވެއެވެ.
ދަރުހުގެ ބައިވެރިންގެ ޝައުޤުވެރިކަން އިތުރުކުރުމަށްޓަކައި، ބައިވެރިންގެ ތެރެއިން ގުރުއަތުން ހޮވޭފަރާތަކަށް އިނާމެއްގެ ގޮތުގައި ފޯނެއް ލިބޭނެ ކަމަށްވެސް ޖަމިއްޔާއިން ހާމަކޮށްފައިވެއެވެ.
Advertisement
This content is created and paid for by advertisers and does not involve Voice Journalists
