އެއާޕޯޓް ޓެކްސްއަށް ގެނައި ބަދަލާއެކު މިއަދުން ފެށިގެން އެއާޕޯޓުން ފުރާ ބިދޭސީންގެ އަތުން ނަގާ ފީ އާއި ޓެކްސް ބޮޑުވެއްޖެއެވެ.

އެއާޕޯޓް ޓެކްސް މުރާޖައާކުރުމަށްފަހު، މަޖިލީހުން ފާސްކޮށްފައިވަނީ، އޮކްޓޯބަރުމަހުގެ 31 ވަނަ ދުވަހެވެ. މަޖިލީހުން ފާސްކުރިގޮތުން  އެއާޕޯޓުން އިކޮނޮމީ ކްލާހުގައި ފުރާ ކޮންމެ ފަސެންޖަރެއްގެ އަތުން މިއަދުން ފެށިގެން ނަގަމުންދާނީ 50 ޑޮލަރެވެ. މީގެ ކުރިން އިކޮނޮމީ ކްލާހުން ދަތުރުކުރާ ބިދޭސީން އަތުން ނަގަމުން އައިސްފައިވަނީ 30 ޑޮލަރެވެ. އިކޮނޮމީ ކްލާހުން ދަތުރުކުރާ ބިދޭސީންގެ އަތުން ނެގިނަމަވެސް އިކޮނޮމީ ކްލާހުން ފުރާ ދިވެހިންގެ އަތުން ނަގާ ޓެކްސް ބޮޑުކޮށްފައެއް ނުވެއެވެ.

ނަމަވެސް ބިޒްނަސް ކުލާހުން ދަތުރުކުރާނަމަ، ފުރާ ދިވެހިންނާއި ބިދޭސީންގެ އަތުން މިހާރު ނަގަމުން އަންނަ 60 ޑޮލަރުގެ ބަދަލުގައި ދެން ނަގަމުންދާނީ 120 ޑޮލަރެވެ. އަދި އަމިއްލަ ޖެޓްތަކުގައި އަންނަ މީހުންގެ އަތުން ވަނީ 120 ޑޮލަރުގެ ބަދަލުގައި 480 ޑޮލަރު ނަގާނެއެވެ.

ސަރުކާރުން ވަނީ ޓޫރިސްޓެއްގެ ބޮލަކަށް މިހާރު ދުވާލަކަށް 6 ޑޮލަރު ގްރީން ޓެކްސްގެ ގޮތުގައި ނަގަމުން އަންނަ ތަންތަނުން އަންނަ ޖެނުއަރީމަހުން ފެށިގެން 12 ޑޮލަރު ނެގުމަށްވެސް ނިންމާފައެވެ. އަދި ގްރީން ޓެކްސްގެ ގޮތުގައި 3 ޑޮލަރު ދައްކަމުން އައި ތަންތަނުން 6 ޑޮލަރު ދައްކަން ޖެހޭނެ ކަމަށް އެ އިސްލާހުގައި ބުނެފައިވެއެވެ.

ސަރުކާރުން ލަފާކުރާގޮތުގައި އެއާޕޯޓުންނާއި ގްރީން ޓެކުހުން ނަގާ ފީތައް ބޮޑުކުރުމާއެކު، އަންނަ އަހަރު މިބައިން ގާތް ގަނޑަކަށް 5 ބިލިއަން ރުފިޔާ ލިބޭނޭކަމަށް ލަފާކުރެއެވެ.