އިންޑިއާއާއެކު އޮންނަ ގުޅުން ބަދަހިކުރުމަށް މަސައްކަތްކުރަމުންދާކަމަށް ބަންގްލަދޭޝްގެ ވަގުތީ ސަރުކާރުގެ މުޝީރުގެ ތަރުޖަމާނު ވިދާޅުވެއްޖެއެވެ.

ބަންގްލަދޭޝްގެ ވަގުތީ ސަރުކާރުގެ އިސް މުޝީރުގެ މަގާމުގައި ހުންނެވި މުހައްމަދު ޔޫނުސްގެ ތަރުޖަމާނު ޝަފީގުލް އާލަމް ވިދާޅުވީ އިންޑިއާގެ ފޮރިން ސެކްރެޓަރީ ދާދި އަވަހަށް ބަންގްލަދޭޝްއަށް ކުރައްވާ ދަތުރުފުޅުގައި ދެގައުމުގެ ދެމެދުގައި މުހިއްމު މަޝްވަރާތަކެއް ކުރިއަށްދާނެ ކަމަށެވެ. އަދި ދެގައުމުގެ ގުޅުން ވަރުގަދަކަމަށާއި، ކުރިއަށް އޮތްތަނުގައި އެ ގުޅުން އިތުރަށް ވަރުގަދަ ކުރުމަށް އިތުރު މަސައްކަތްތައް ދެގައުމުންވެސް ކުރަމުންދާކަމަށް ޝަފީގުލް އާލަމް ވިދާޅުވިއެވެ.

ދެގައުމުގެ ގުޅުން ރަނގަޅުކަމަށް ބަންގްލަދޭޝްއިން ބުނިނަމަވެސް، ދެގައުމުގެ ގުޅުމުގައި ކޮންމެވެސް ވަރަކަށް 'ކުނި ޖެހިފައިވާކަމަށް' ބައެއް ތަޖުރިބާކާރުން ބުނެއެވެ. ޚާއްސަކޮށް ޝެއިޚް ހަސީނާގެ ވެރިކަން ނިމުމަމަށްފަހު ބަންގްލަދޭޝްއަށް އައި ހަލަބޮލިކަމަށްފަހު ދެގައުމުގެ ގުޅުން އޮތީ ކޮން ހާލަތެއްގައިތޯ މުހައްލިލުން ސުވާލު އުފައްދައެވެ.

Advertisement