ރާއްޖެއިން ތައިލެންޑަށް ކަނޑައަޅާފައި ހުންނަ ސަފީރުކަމުގެ މަގާމަށް, އިލެކްޝަން ކޮމިޝަނުގެ ކުރީގެ ރައީސް ފުއާދު ތައުފީގް އައްޔަނުކުރުމަށް މަޖިލީހުން ފާސްކޮށްފިއެވެ.

ފުއާދު އައްޔަނުކުރުމަށް ވޯޓަށް އެހުމުން 58 މެމްބަރުން ވަނީ ފެންނަކަަމަށް ވޯޓު ދީފައެވެ. ތައިލެންޑަށް ކަނޑައަޅާ ސަފީރަކަށް ފުއާދު އައްޔަނުކުރުމަށް ރައީސުލްޖުމްހޫރިއްޔާ ނަން ފޮނުއްވީ މިދިޔަ ނޮވެމްބަރުމަހުގެ 25 ވަނަ ދުވަހުއެވެ. ސަފީރަކަށް ފުއާދު ތައުފީގް އައްޔަނުކުރުމަށް މަޖިލީހުގެ ހާރިޖީ ގުޅުންތަކުގެ ކޮމިޓީން ރުހުންދީފައިވަނީ މިމަހުގެ 3 ވަނަ ދުވަހުއެވެ.

ފުއާދު ތައުފީގު އެންމެފަހުން ހުންނެވީ އިލެކްޝަން ކޮމިޝަނުގެ ރައީސްކަމުގެ މަގާމުގައެވެ. ފުއާދު ވަނީ އެ މަގާމު ދެ ދައުރު ފުރިހަމަ ކުރައްވާފައެވެ. 

ފުއާދު ތައުފީގް އެންމެ ފުރަތަމަ އިލެކްޝަންސް ކޮމިޝަނުގެ މެމްބަރެއްގެ ގޮތުގައި ހުންނެވީ، 2008 ވަނަ އަހަރެވެ. އޭރުއެއީ ރާއްޖެއަށް ސިޔާސީޕާޓީތައް ތައާރަފްވެ، އެންމެފުރަތަމަ ގިނަ ޕާޓީތަކެއް ބައިވެރިވެގެން އިންތިހާބު ބޭއްވި އަހަރެވެ. އެއަށްފަހު ދެން އިެލކްޝަނުގެ މެމްބަރުކަމަށް ފުއާދު ވަޑައިގެންނެވީ 2019 ވަނަ އަހަރެވެ. ފުއާދު ކޮމިޝަނުގެ ރައީސްކަމުގެ މަގާމަށް އައްޔަނުކުރެވުނީ، 2021 ވަނަ އަހަރު އޭރު ކޮމިޝަނުގެ ރައީސަކަށް ހުންނެވި އަހުމަދުޔ ޝަރީފް މަގާމުން އިސްތިއުފާދިނުމުންނެވެ.

ފުއާދު ތައުފީގަކީ އިލެކްޝަންސް ކޮމިޝަނުގައި އެންމެ ގިނަދުވަސްވަންދެން މަސައްކަތްކުރައްވައި އެ ދާއިރާގައި ހުރި ރާއްޖޭގެ އެންމެ ތަޖުރިބާކާރު ބޭފުޅާއެވެ.