ބިންވެރިޔާ ސްކީމްގެ އުސޫލާ ހިލާފަށް ގެވަޅުދިން މައްސަލާގައި، އެޗްޑީސީގެ ކުރީގެ މެނޭޖިންގ ޑިރެކްޓަރު ފަޒުލް ރަޝީދު ދިރިއުޅުއްވާ ގެއަށް ފުލުހުން ވަދެ ފާސްކޮށްފިއެވެ.
މައުލޫމާތު ލިބިފައިވާ ގޮތުގައި ފަޒުލް ދިރިއުޅެމުން އަންނަ ޒޭވަރުގެއަށް ފުލުހުން ވަދެ ފާސްކޮށްފައިވަނީ ރޭގެ ވަގުތެއްގައެވެ. ނަމަވެސް އެގެއަށް ވަދެ އެއްވެސް އެއްޗެއް ގެންދިޔަކަމުގެ މައުލޫމާތެއް ފުލުހުން އަދި ހާމައެއް ނުކުރެއެވެ.
ފަޒުލް ދިރިއުޅުއްވާ ގެއަށް ފުލުހުން ވަދެފައިމިވަނީ ބިންވެރިޔާ ސްކީމުގެ އުސޫލުން ބޭރުން ފަޒުލްގެ ބޭބެއަށް ގެވަޅެއް ދޫކުރި މައްސަލާގައެވެ. މި މައްސަލާގައި ފަޒުލް ވަނީ އިސްތިއުފާ ދެއްވާފައިވާއިރު، އޭނާ ވަނީ މި މައްސަލާގައި ކުރަމުންގެންދާ ތުހުމަތުތަކަށް އިންކާރުކުރައްވާފައެވެ. އުސޫލާ ހިލާފަށް ގެވަޅު ދޫކުރި މައްސަލައާ ބެހޭގޮތުން ނޫސްވެރިންނަށް މައުލޫމާތު ދެއްވަމުން ފަޒުލް ވިދާޅުވެފައިވަނީ، އެޗްޑީސީއަކުން ނުގަވައިދުން އެއްވެސް މީހަކަށް ގޯއްޗެއް ފްލެޓެއް ދޫކޮށްފައި ނުވާނޭކަމަށާއި، އެއީ އެޗްޑީސީއަށް ކުރެވޭނޭ ކަމެއްވެސް ނޫންކަމަށެވެ.
މި މައްސަލާގައި ފުލުހުން ވަނީ އެޗްޑީސީއަށް ވަދެ، ޖިނާއީ ތަހުގީގެއްވެސް ފަށާފައެވެ. މިކަމާ ގުޅޭގޮތުން ފުލުހުން ބެއްވި ނޫސްވެރިންގެ ބައްދަލުވުމެއްގައި ބުނެފައިވަނީ، ކުރީ ސަރުކާރުން އުސޫލުން ބޭރުން ބައެއް ފަރާތްތަކަށް ގޯތި ދިނުމަށް ލިޔުން ދޫކޮށްފައިވާކަން ފާހަގަކުރެވިފައިވާކަމަށެވެ. ފުލުހުންގެ އެ ވާހަކަތަކާ ގުޅިގެން މިދިޔަ ސަރުކާރުގެ ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވަނީ ފުލުހުންގެ އެ ވާހަކަތަކަކީ ސިޔާސީ ވާހަކަތަކެއް ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
