ވެލާނާ އިންޓަރނޭޝަނަލް އެއާޕޯޓު (ވީއައިއޭ) ގެ މަޝްރޫއަށް އަބޫދާބީ ފަންޑް ފޯ ޑިވެލޮޕްމަންޓުން އިތުރު 40 މިލިޔަން ޑޮލަރުގެ ލޯނު އެހީ ދިފިއެވެ.

މިއީ 2017 ވަނަ އަހަރު މި މަޝްރޫއުގެ ފުރަތަމަ މަރުހަލާތަކަށް ދީފައިވާ 50 މިލިއަން އެމެރިކާ ޑޮލަރުގެ ލޯނަށް އިތުރަށް ދިން އަދަދެކެވެ.

މި އެއްބަސްވުމުގެ ދަށުން ވެލާނާ އިންޓަރނޭޝަނަލް އެއަރޕޯޓުގެ ހުޅަނގު ފަރާތުގެ ފަސިންޖަރުން ބޭނުންކުރާ ޓާމިނަލް ތަރައްގީކޮށް، 26 މަތިންދާބޯޓު ބޭއްވޭ ވަރަށް ބޮޑުކުރުމާއި، ބައިނަލްއަގްވާމީ ފަސިންޖަރުންނަށް އައު އިމާރާތެއް އެޅުން ހިމެނޭއިރު، މި އެއްބަސްވުމާއި ގުޅޭ ރަސްމިއްޔާތުގައި ވާހަކަފުޅު ދައްކަވަމުން މާލީ ވަޒީރު މޫސާ ޒަމީރު ވަނީ ޔޫއޭއީ އަދި އޭޑީއެފްޑީން ދިވެހިރާއްޖޭގައި ދެމެހެއްޓެނިވި ތަރައްޤީ ކުރިއެރުވުމަށް ދެމުންދާ އެހީތެރިކަމަށް ޝުކުރު އަދާކުރައްވާފައެވެ.

Advertisement

މިގޮތުން ވަޒީރު ޒަމީރު ވިދާޅުވީ، އޭޑީއެފްޑީގެ ފަންޑިންގއަކީ ދުނިޔޭގެ ފެންވަރުގެ ޚިދުމަތްތަކާއި ޓެކްނޮލޮޖީ ހިމެނޭ އިންޓަރނޭޝަނަލް އެއަރޕޯޓެއް ޤާއިމުކުރުމަށް ވަރަށް މުހިންމު އެހީތެރިކަމެއްކަމަށެވެ. އަދި މިއީ ދަތުރުފަތުރުގެ ދާއިރާގައި އުމްރާނީ ވަސީލަތްތައް ތަރައްޤީކުރުމާއި، ދަތުރުކުރާ މީހުންނަށް ލިބޭ ތަޖުރިބާ ރަނގަޅުކުރުމާއި، ޤައުމީ އިޤްތިޞާދުގެ މުހިންމު ތަނބެއް ކަމުގައިވާ ފަތުރުވެރިކަމުގެ އާމްދަނީ އިތުރުކުރުމަށް ޤައުމީ ލަނޑުދަނޑިތައް ޙާޞިލުކުރުމުގައި ވަރަށް މުހިންމު މަރުޙަލާއެއްކަން ވަޒީރު ފާހަގަކުރެއްވިއެވެ.

ވަޒީރު ޒަމީރުގެ އިތުރުން، އޭޑީއެފްޑީގެ ޑިރެކްޓަރ ޖެނެރަލް މުޙައްމަދު ސައިފް އައްސުވައިދީ ވިދާޅުވީ، އަބޫދާބީ ފަންޑުގެ ޕާޓްނަރ ޤައުމުތަކުގެ އިޤްތިޞާދީ އަދި އިޖްތިމާޢީ ތަރައްޤީއަށް ބޮޑެތި ބަދަލުތައް ގެނެސްދޭ މަޝްރޫޢުތަކަށް ފައިސާ ހަމަޖެއްސުމުގައި މުހިންމު ދައުރެއް އަދާކުރާކަމަށާއި، އޭގެ ތެރޭގައި، ވީއައިއޭ ޒަމާނީކޮށް ތަރައްޤީކުރުމަށް އޭޑީއެފްޑީން ދެވޭ އިތުރު އެހީތެރިކަމުން ދިވެހިރާއްޖޭގައި ކުރިއަރަމުންދާ ފަތުރުވެރިކަމުގެ ޑިމާންޑަށް ފެތޭގޮތަށް އެ އެއާޕޯޓުން ޚިދުމަތްދެވިގެންދާނެ ކަމަށެވެ.

މުޙައްމަދު ސައިފް އައްސުވައިދީ އިތުރަށް ވިދާޅުވިގޮތުގައި، އޭޑީއެފްޑީން ދިވެހި ސަރުކާރާއެކު އޮންނަ ގުޅުން ބަދަހިކުރުމަށް މަސައްކަތްކުރަމުންދާއިރު، ދިވެހި ރައްޔިތުންގެ އުންމީދުތައް ޙާޞިލުކޮށްދީ، ވަޒީފާގެ ފުރުޞަތުތައް އުފައްދައި، ދެމެހެއްޓެނިވި ތަރައްޤީ ގެނެސްދޭ މުހިންމު މަޝްރޫޢުތަކުގައި އެއްބާރުލުން ދެއްވާނެއެވެ.