ބިންވެރިޔާ ހައުސިންގ ސްކީމާ ގުޅުންހުރި މައްސަލައާ ގުޅިގެން، ކުރިން ރާއްޖެއިން ބޭރަށް ދަތުރުކުރުން މަނާކުރި މީހުންގެ ތެރެއިން 9 މީހެއްގެ މައްޗަށް ނެރެފައިވާ އަމުރު ބާތިލު ކޮށްފިއެވެ.

ފުލުހުން މިއަދު ބުނީ، މި ފިޔަވަޅު އަޅާފައިވަނީ ޕްރޮސެކިއުޓަރ ޖެނެރަލްއާ މަޝްވަރާކޮށް، ޕްރޮސެކިއުޓަރ ޖެނެރަލްގެ ލަފާގެ މަތިންކަމަށެވެ. 

މި މައްސަލައާ ގުޅިގެން ކުރިން ރާއްޖެއިން ބޭރަށް ދަތުރުކުރުން މަނާކޮށްފައިވާ ފަރާތްތަކުގެ ތެރެއިން މިހާރު އަމުރު ބާތިލުކޮށްފައިވާ 9 މީހުންގެ ތެރޭގައި އެޗްޑީސީގެ ކުރީގެ މެނޭޖިންގ ޑިރެކްޓަރ އިބްރާހިމް ފަޟުލް ރަޝީދު އަދި މުޙައްމަދު ފަޟީލް ރަޝީދު ނުހިމެނޭކަން ފުލުހުން ފާހަގަކޮށް ފާހަގަކޮށްފައިވެއެވެ.

Advertisement

ނަމަވެސް ހުއްދަ ދިން 9 މީހުންނަކީ ކޮބައިކަން ފުލުހުން ހާމަކޮށްފައެއް ނުވެއެވެ.

އެޗްޑީސީގެ މެނޭޖިންގ ޑިރެކްޓަރ ފަޒުލް ރަޝީދުގެ އެއްބަނޑު އެއްބަފާ ބޭބެ އަދި އެމްޑަބްލިޔުއެސްސީގެ ޑެޕިޔުޓީ މެނޭޖިން ޑިރެކްޓަރ ފަޒީލް ރަޝީދު ހިމެނޭ ގޮތަށް ބަޔަކަށް ބިންވެރިޔާ ސްކީމްގެ ބޭރުން ހުޅުމާލެއިން ގޯތިތަކެއް ދޫކުރި މައްސަލައިގެ ޖިނާޢީ ތަހުގީގެއް ފުލުހުން ވަނީ ފަށާފައެވެ.

އެއާއެކު ފުލުހުން ވަނީ، އެ މައްސަލާގައި އެންމެ ބޮޑަށް ތުހުމަތުވާ މީހުންގެ ތެރޭގައި ހިމެނޭ ފަޒުލް ރަޝީދާއި، ފަޒީލް ރަޝީދު ހިމެނޭހެން، ހައުސިން މިނިސްޓްރީއާ، އެޗްޑީސީގެ ގިނަ ވެރިންތަކެއްގެ ޕާސްޕޯޓްވެސް ހިފަހައްޓާފައިވެ އެވެ. އަދި ކުރީ ސަރުކާރުގެ ސްޓޭޓް މިނިސްޓަރ އަކުރަމް ކަމާލުއްދީނާއި، ކުރީގެ ސީނިއާ އެގްޒެކެޓިވް މުހައްމަދު އާރިފްއާ، ކުރީގެ ސީނިއާ އެގްޒެކެޓިވް ޑިރެކްޓަރު ލިރުގާމް ވަހީދުއާ، ޑިރެކްޓާ ޖެނެރަލް އަހްމަދު ވިޝާން ނަސީމްގެ ޕާސްޕޯޓްވެސް ހިފަހައްޓާފައިވެއެވެ.