އައު އަހަރާއި ދިމާކޮށް ޕްރައިވެޓް ޖެޓްތައް ރާއްޖެއައި އަދަދު މިދިޔަ އަހަރާއި އަޅާބަލާއިރު 8 އިންސައްތަ އިތުރުވެފައިވާކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހާމަކޮށްފިއެވެ.

މިގޮތުން އެމްއޭސީއެލުން ބުނީ، މިދިޔަ އަހަރުގެ ޑިސެމްބަރު މަހުގެ 28 ވަނަ ދުވަހުގެ ނިޔަލަށް 2،107 ޖެޓު މޫވްމަންޓްސް ރިކޯޑް ކުރެވުނު ނަމަވެސް މިއަހަރު މިހާތަނަށް 2،326 ޖެޓު މޫވްމަންޓްސް ރިކޯޑު ކުރެވިފައިވާ ކަމަށެވެ. 

އެމްއޭސީއެލުން ހިއްސާކޮށްފައިވާ ޑިސެމްބަރު މަހުގެ ތަފާސް ހިސާބުތަކަށް ބަލާއިރު، މިއަހަރުގެ ޑިސެމްބަރު 28 ވަނަ ދުވަހާއި ހަމައަށް 148 ޖެޓު މޫވްމެންޓްސް ވަނީ ރެކޯޑް ކުރެވިފައެވެ.

މިދިޔަ އަހަރުގެ އެ މުއްދަތުގައި ރިކޯޑުކުރެވިފައިވަނީ ޖުމްލަ 137 ޖެޓު މޫވްމަންޓްސްކަމަށްވާއިރު، މިއަހަރުގެ ޑިސެމްބަރު މަހު އެކަނިވެސް 8 އިންސައްތައިގެ ކުރިއެރުމެއް ވަނީ ހޯދާފައެވެ.

އެމްއޭސީއެލުން ބުނީ، އެއާޕޯޓުގައި ޖެޓުތައް ޕާކް ކުރަން ހާއްސަ ސަރަހައްދުގައި 68 ޖެޓު ޕާކު ކުރުމަށް ޖާގަ އޮތްނަމަވެސް، އެ ޖާގަތައް ފުރުމާއި ގުޅިގެން  އެހެން ސަރަހައްދުތަކުގައިވެސް ބާއްވަމުންދާ ކަމަށެވެ.