ރާއްޖޭގެ ޤައުމީ އެއާލައިން މޯލްޑިވިއަނުން ހާއްސަ އެއާ ޝޯއެއް ބޭއްވުމަށް ނިންމައިފިއެވެ.
އެއާޝޯ ބޭއްވުމަށް ނިންމާފައިވަނީ، އަންނަ ޖެނުއަރީމަހުގެ 6 ވަނަ ދުވަހުގެ ހަވީރެވެ. ޝޯ ކުރިއަށްދާނީ 17:00 އިން 17:30 ގެ ނިޔަލަށެވެ. މޯލްޑިވިއަނުން ބުނީ މި ޝޯ މާލޭގެ އުސްފަސްގަނޑާއި ހުޅުމާލެ ފޭސް އެކެއް އަދި ދޭއްގެ އިރުމަތީ ފަރާތު އަތިރިމަތީ ސަރަހައްދުން ފެންނާނޭކަމަށެވެ. މޯލްޑިވިއަނުން ބާއްވާ މި އެއާޝޯގައި އެ އެއާލައިނުގެ ފްލީޓުތަކުގައި ބޭނުންކުރާ ބޯޓުތައް ދައްކާލުމަށް ވަނީ ހަމަޖެހިފައެވެ.
މޯލްޑިވިއަނުން މި އެއާޝޯ ބާއްވަނީ، އެ އެއާލައިނުގެ ފްލީޓުގައި ބޭނުންކުރުމަށް ގެންނަ އައު ބޯޓު، އެއާބަސް މަރުކާގެ އޭ330 ވައިޑްބޮޑީ ބޯޓަށް މަރުހަބާކިއުމުގެ ގޮތުންނެވެ. މިއީ މޯލްޑިވިއަންގެ އޮޕަރޭޝަންތަކުގައި ބޭނުންކުރުމަށް ގެންނަ މިފަދަ ފުރަތަމަ ބޯޓެވެ. މިއީ 264 މީހުންގެ ޖާގައިގެ ބޯޓެކެވެ.
މޯލްޑިވިއަނުން އެއާބަސް މަރުކާގެ ބޮޑު ބޯޓެއް ގެނައުމަށް ނިންމީ ދުރު މަންޒިލްތަކަށް ދަތުރުތައް ފެށުމަށްޓަކައެވެ. އެގޮތުން ފުރަތަމަ ދަތުރުތައް ބޭއްވުމަށް ނިންމާފައިވަނީ ޗައިނާގެ 3 ސިޓީއަކަށެވެ. އެއަށްފަހު މޯލްޑިވިއަނުން ނިންމާފައިވަނީ ޔޫރަޕަށް ދަތުރުތައް ފެށުމަށެވެ.
Advertisement
This content is created and paid for by advertisers and does not involve Voice Journalists
