ވެލާނާ އިންޓަރނޭޝަނަލް އެއަރޕޯޓުން ފުރާ ފަސިންޖަރުން، އެމީހުންގެ ފްލައިޓް ފުރުމުގެ މަދުވެގެން 3 ގަޑިއިރު ކުރިން އެއަރޕޯޓަށް އައުމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އެދިއްޖެއެވެ.

އެމްއޭސީއެލްއިން މިއަދު ނެރުނު ނޫސްބަޔާނެއްގައި ބުނެފައިވަނީ، މާދަމާ އުމްރާއަށް ދާ މީހުން އައުމާ ގުޅިގެން އެއަރޕޯޓު ސަރަޙައްދުގެ މަގުތަކާއި ޓާމިނަލް ސަރަޙައްދުގައި ޓްރެފިކް ބާރު ބޮޑުވުމަކީ އެކަށީގެންވާ ކަމެއް ކަމަށެވެ.

މިކަމަށް ރިޢާޔަތްކޮށް، ދަތުރުކުރާ ފަރާތްތަކަށް އުނދަގޫ ނުވާނެ ގޮތަށް ދަތުރު ރާވައި، އެކަށީގެންވާ ވަގުތު ކުރިން އެއަރޕޯޓަށް އައުމަށް އެމްއޭސީއެލްއިން އިލްތިމާސްކޮށްފައިވެއެވެ.

މީގެއިތުރުން، މި ބިޒީ ދުވަހު އެއްބާރުލުން ދިނުމަށް ހުރިހާ ޓެކްސީ ސެންޓަރުތަކާއި ޑްރައިވަރުންނަށް އެމްއޭސީއެލްއިން އެދިފައިވެއެވެ. ޚާއްޞަކޮށް، ވަގުތަށް ޕިކްއަޕް އަދި ޑްރޮޕްއޮފް ހެދުމަށާއި، އެއަރޕޯޓު ވަށައިގެން ޓްރެފިކް ފްލޯ ހިފެހެއްޓުމަށް އެދިފައިވެއެވެ.

މާދަމާގެ އެންމެ ބިޒީ ވަގުތުތަކަކީ؛

ހެނދުނު 6:00 އިން 9:00 އަށް

މެންދުރުފަހު 14:00 އިން 16:00 އަށް

ހެނދުނުގެ ބިޒީ ގަޑީގައި 2,678 މީހުން (އޭގެތެރޭގައި 618 އުމްރާ ވެރިން ހިމެނޭގޮތަށް) އަންނާނެ ކަމަށާއި، 1,372 މީހުން ފުރާނެ ކަމަށް ބުނެފައިވެއެވެ.

އަދި މެންދުރުފަހުގެ ބިޒީ ގަޑީގައި 2,071 މީހުން (452 އުމްރާ ވެރިން ހިމެނޭގޮތަށް) އަންނާނެ ކަމަށާއި، 1,091 މީހުން ފުރާނެ ކަމަށް ލަފާކޮށްފައިވެއެވެ.

އިތުރު މަޢުލޫމާތު ހޯދުމަށް އެމްއޭސީއެލްގެ މީޑިއާ އެންޑް ޕީއާރު ހޮޓްލައިން ނަންބަރު 7409559 އަށް ގުޅުމަށް އެދިފައިވެއެވެ.