މަގުތައް އާއްމު ޙާލަތައް އަންނަންދެން ބަރު އުޅަނދުތައް މާލޭގެ މަގުމަތީގައި ނުދުއްވަން ފުލުހުން އެދިއްޖެއެވެ.
ރާއްޖެއަށް މިހާރު ކުރަމުންދާ ވިއްސާރާގައި މާލޭގެ މަގުތައް ވަނީ ވަރަށް ބޮޑަށް ފެން ބޮޑުވެފައެވެ. އޭގެ ސަބަބުން ހިނގާ ބިނގާވެ އުޅުމަށް ދަތިވެފައިވާއިރު، ބައެއް ގެތަކަށް ފެންވަދެ ގެއްލުންތައް ވެފައިވެއެވެ.
ޚާއްސަކޮށް ބަރު އުޅަނދުތަކާއި ހަތަރު ފޮރޮޅުލީ އުޅަނދުތަކުން އުފެދޭ ރާޅުތަކުން ގޭގެއަށް ފެންވަދެ، ޕާކު ކޮށްފައި ހުންނަ ސައިކަލުތައް ވެއްޓުން ފަދަ މައްސަލަތައް އަންނަނީ ކުރިމަތިވަމުންނެވެ.
އެކަމާއި ގުޅިގެން ފުލުހުން މިއަދު ނެރުނު ސަމާލުގައިވަނީ، މަގުތަކުން ފެންހިނދި އާއްމު ހާލަތަށް މަގުތައް ރުޖޫޢަވަންދެން ބަރު އުޅަނދުތައް މާލޭގެ މަގުތަކުގައި ނުދުއްވުމަށާއި، ހަތަރު ފޮރޮޅުލީ އުޅަނދުތައް ޒަރޫރީ ބޭނުންތަކުގައި މެނުވީ ނުދުއްވުމަށް އެދިފައެވެ.
ރާއްޖެއަށް މިހާރު ކުރަމުންދާ ވިއްސާރާގައި މާލޭގެ މަގުތަކުގައި ފެންބޮޑުވެ ފެންހިންދުމުގެ މަސައްކަތް ހުއްޓުމެއްނެތި ސިފައިން ކުރަމުން އަންނައިރު، މާލޭގެ ގޭގެއަށާއި ފިހާރަ ތަކަށް ފެން ވަނުމުން ރައްކާތެރިކުރުމަށް ވެލިބަސްތާ ޖެހުމާއި ފެން ވަދެފައިވާ ގޭބިސީތަކުން ފެން ހިންދުމުގައި ފުލުހުން ދަނީ ހަރަކާތްތެރިވަމުންނެވެ.
މި ހާދިސާ އާއި ގުޅިގެން އެއްވެސް އެހީތެރިކަމެއް ބޭނުންވާނަމަ 911 އަށް ގުޅުމަށް ފުލުހުން އެދިފައުވެއެވެ.
Advertisement
This content is created and paid for by advertisers and does not involve Voice Journalists
