އެންމެ އިސްކަމެއްދެއްވައިގެން ގދ.ރަތަަފަންދޫ ސްކޫލްގައި މަލްޓިޕާޕޯސް ހޯލެއް ގާއިމުކުރުމުގެ މަސައްކަތް ކުރިއަށް ގެންދަވާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރައީސް ޑރ.މުޢިއްޒު މިފަދައިން ވިދާޅުވީ، ހުވަދުއަތޮޅަށް އެމަނިކުފާނު މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ގދ.ރަތަފަންދޫއަށް އަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި، ވާހަކަފުޅު ދައްކަވަމުންނެވެ.
އެރަށަށް ވަޑައިގެން ސަލާމް ކުރައްވަމުން ގެންދަވަނިކޮށް ބައެއް ދަރިވަރުން ރަށުގެ ސްކޫލަށް މަލްޓިޕާޕޯސް ހޯލެއް ބޭނުންވާކަން ހާމަކޮށްފައިވާކަން ފާހަގަކުރައްވަމުން ރައީސް ޑރ.މުޢިއްޒު ވިދާޅުވީ، އެންމެ އިސްކަމެއްދެއްވައިގެން ރަތަފަންދޫ ސްކޫލުގައި މަލްޓިޕާޕޯސް ހޯލެއް އެޅުމުގެ މަސައްކަތް ކުރިއަށް ގެންދަވާނެކަމުގެ ޔަގީންކަން ދެއްވާކަމަށާއި، އޭގެ ބޭނންތެރިކަން ފެނިވަޑައިގެންނަވާކަމަށެވެ.
"އަޅުގަނޑު ސަލާމް ކުރަމުން ދިޔައިރު، ބައެއް ކުދިން އަޅުގަނޑު އަތަށް ސިއްރު ސިއްރުން ކުޑަ ގަނޑުކޮޅެއް ދިއްކޮށްލި. އެ ގަނޑުކޮޅުގައިވެސް އޮތީ އެވާހަކަ. އޭގައިވެސް މިބުނަނީ އަޅުގަނޑުމެންގެ ސްކޫލަށް މަލްޓިޕާޕޯސް ހޯލެއް އިންތިހާއަށް ބޭނުންވެއޭ. ދެން ބޭނުންވާ ސަބަބުތައް ހަމަ ވަރަށް ރީތިކޮށް ލިޔެލާފައި އެބަހުރި،"
ރައީސް ޑރ.މުޢިއްޒު ވިދާޅުވިއެވެ.
މީގެ އިތުރުންވެސް، އެ އަތޮޅުގައިވެސް އެންމެ ހާލުދަށްކޮށް އޮތް ބަދަރަކަށް ރަތަފަންދޫ ބަނދަރުވާއިރު، އެރަށުގެ ބަނދަރުގެ ހާލަތަށް އިޝާރާތްކުރައްވައި ރައީސް ޑރ.މުޢިއްޒު ވަނީ މިއަހަރު ކުރިއަށް ގެންދާ ބަނދަރު މަޝްރޫއުތަކުގެ ތެރޭގައި ރަތަފަންދޫގެ ބަނދަރު ހިމަނައިގެން ރަށުގެ ބަނދަރު ހަދައިދެއްވާނެކަމަށް ވިދާޅުވެފައެވެ.
ރައީސް ޑރ.މުޢިއްޒު އިތުރަށް ވިދާޅުވީ، މިއަހަރާއި މި އަންނަ އަހަރު ކުރިއަށް ގެންދިޔުމަށް ނިންމަވާފައިވަނީ ރައްޔިތުންނަށް ބޭނުންވާ މުހިންމު މަޝްރޫއުތައް ކަމަށާއި، މިއަހަރުގެ ބަޖެޓުގެ ތެރެއިން ވީހާވެސް ގިނަ ވައުދުފުޅުތަކަކަށް އަމަލީ ސިފަ ގެނެސް، މި އަންނަ އަހަރު މިފަދައިން ނުފެށި ހުރި މަޝްރޫއުތައް ފައްޓަވާނެކަމަށެވެ.
Advertisement
This content is created and paid for by advertisers and does not involve Voice Journalists
