ފުލުހުންގެ އިކޮނޮމިކް ކްރައިމް އިންވެސްޓިގޭޝަން ހެޑް ސުޕްރިންޓެންޑެންޓް އޮފް ޕޮލިސް ރަޖުނީ ޝުއައިބަށް ވިނަރެހުން ފްލެޓް ލިބުމުގައި އުސޫލާ ހިލާފަށް ކަމެއް ހިންގާފައިވާކަން ފާހަގަކުރެވެން ނެތްކަމަށް ފުލުހުން ބުނެފިއެވެ.

ފުލުހުން އެކްސްގައި ކުރި ޕޯސްޓެއްގައި މިހެން ބުނެފައިވަނީ، ވިނަރެސް ފްލެޓްތަކުން އުސޫލާ ހިލާފަށް ރަޖުނީއަށް އެޕާޓްމަންޓެއް ލިބުނުކަމަށް ސޯޝަލް މީޑިއާގައި ފެތުރުނު ވާހަކަތަކާ ގުޅިގެން ފުލުހުން އެ މައްސަލަ ބެލުމަށް ދިރާސާކުރި ކުރުމަށްފަހު އެވެ. ފުލުހުން ބުނީ ރަޖުނީގެ ފަރާތުން އެފަދަ ކަމެއް ކުރިކަން ފާހަގަކުރެވިފައި ނުވާކަމަށެވެ.

ރަޖުނީއަށް ވިނަރެހުން ފްލެޓް ލިބުނީ އުސޫލާހިލާފަށްކަމަށް ވާހަކަ ދެކެވެން ފެށުމުން ފުލުހުންގެ މުއައްސަސާއިން ވަނީ، ރަޖުނީ ޝުއައިބު، އަދާކުރައްވަމުން ގެންދެވި މަގާމުގެ ޒިންމާތަކުން އެކަހެރިކޮށްފައެވެ. 

މިކަމާ ގުޅޭގޮތުން ފުލުހުންގެ ތަރުޖަމާނު، އެސިސްޓެންޓް ކޮމިޝަނަރ އޮފް ޕޮލިސް އަހުމަދު ޝިފާން ސޯޝަލް މީޑިއާގައި އޭރު ހިއްސާ ކުރެއްވި ޕޯސްޓެއްގައި ވިދާޅުވީ، ރަޖުނީ އަދާކުރައްވަމުން ގެންދެވި މަގާމުގެ ޒިއްމާތައް ވަގުތީގޮތުން، އެހެން ފަރާތަކާ ހަވާލުކޮށްފައިވާކަމަށެވެ. އެހެން ހެއްދެވީ ރަޖުނީގެ މައްޗަށް ކޮށްފައިވާ ތުހުމަތުތަކާ ގުޅިގެން، ބިންވެރިޔާ ސްކީމާގުޅޭ ތަހުގީގުގެ ކްރެޑިބިލިޓީ ހިފެހެއްޓުމަށާއި އެ މައްސަލައިގެ ތަހުގީގް ވީހާވެސް ނަޒާހަތްތެރިގޮތެއްގައި ކުރިއަށްގެންދިއުމުގެ ޔަގީންކަން ހޯދުމުގެ ގޮތުންކަމަށްވެސް އޭރު ފުލުހުން ވަނީ ބުނެފައެވެ.

ނަމަވެސް މަގާމުގެ މައްސޫލިއްޔަތުތަކުން ރަޖުނީ އެކަހެރިކުރީ، އޭނާގެ މައްޗަށް ސޯޝަލް މީޑިއާގައި ކުރަމުންދާ ތުހުމަތާ ގުޅިގެން އެއްވެސްކަހަލަ ނުރަނގަޅު ކަންތައްތަކެއް ފެނިގެން ނޫންކަމަށް ފުލުހުން އޭރު ފާހަގަކުރިއެވެ.