ބޮލީވިއާގެ ޖަންގަލިތަކުގައި ރޯވެފައިވާ އަލިފާން ނިއްވާލުމަށް އެގައުމުގެ ސަރުކާރުން ކުރަމުންދާ މަސައްކަތުގައި އެހީތެރިވުމަށް، އިންޑިއާއިން ބޮލީވިއާއަށް އެހީގެ ތަކެތި ފޮނުވައިފިއެވެ.
އިންޑިއާގެ މިނިސްޓްރީ އޮފް އެކްސްޓަރނަލް އެފެއަރޒްއިން ބުނީ އެގައުމުން ބޮލީވިއާއަށް ފޮނުވި ތަކެތީގެ ތެރޭގައި އަލިފާން ނިއްވާ މީހުން ބޭނުންކުރާގެ ސާމާނާއި، ފުރަތަމަ އެހީގެ ކިޓްތަކާއި، ބޭސްފަރުވާއަށް ބޭނުންތަކެތި އަދި ބައެއް އަސާސީ ބޭނުންތަކަށް ބޭނުންވާ ތަކެތި ހިމެނޭކަމަށެވެ. މިތަކެތީގެ ބަރުދަން 16 ޓަނަށް އަރާއިރު، އަލިފާނުގެ ސަބަބުން ދިމާވެފައިވާ ސިއްހީ އަދި ތިމާވެށީގެ މައްސަލަތަކާއި ކުރިމަތިލާން މިތަކެތި ބޭނުން ކުރެވޭނެކަމަށް އިންޑިއާއިން ބުނެއެވެ.
ބޮލީވިއާގެ ޖަންގަލިތަކުގައި ރޯވެ، އަލިފާންގަނޑު އެކި ސަރަހައްދުތަކަށް ފެތުރެމުންދާތީ މިދިޔަ އަހަރުގެ ސެޕްޓެމްބަރު މަހު ކުރީކޮޅުން ފެށިގެން އެގައުމުގައި ވަނީ ކުއްލި ނުރައްކަލުގެ ހާލަތުވެސް އިއުލާންކޮށްފައެވެ.
މީގެ އިތުރުން މި ހަފްތާގައި އިންޑިއާއިން ވަނީ ލެސޯތޯއަށްވެސް އެހީގެ ގޮތުގައި 1000 ޓަނުގެ ހަނޑު ފޮނުވާފައެވެ.
Advertisement
This content is created and paid for by advertisers and does not involve Voice Journalists
