އަފްޣާނިސްތާނުގެ ކޮންޓްރޯލް ނަގާފައިވާ ތާލިބާނުންގެ ލީޑަރޝިޕާއެކު އިންޑިއާގެ އިސްވެރިން އިއްޔެ ޑުބާއީގައި ބައްދަލުކޮށް، މަޝްވަރާކޮށްފިއެވެ.
އިންޑިއާގެ ފަރާތުން ވާހަކަތަކުގައި ބައިވެރިވި ވަފުދުގެ އިސްވެރިއަކަށް ހުންނެވީ އިންޑިއާގެ ފޮރިން ސެކްރެޓަރީ ވިކްރަމް މިސްރީއެވެ. އަދި ތާލިބާނުންގެ ފަރާތުން އިސްކޮށް ބައިވެރިވީ ކާބުލްގައި ގާއިމްކޮށްފައިވާ ތާލިބާން ސަރުކާރުގެ ޚާރިޖީ ވަޒީރު މައުލަވީ އާމިރް ޚާން މުއްތަޤީ އެވެ.
އިންޑިއާއިން އަފްޣާނިސްތާނަށް ދޭ އެހީތެރިކަން ކޮންމެވެސް ވަރަކަށް ދެމުން ދިޔަނަމަވެސް، 2021 ވަނަ އަހަރު ތާލިވާނުން އަފްޣާނިސްތާނުގެ ކޮންޓްރޯލް ނެގުމާއެކު، ދެގައުމުގެ ޑިޕްލޮމެޓިކް ގުޅުން ވަނީ ކުޑަވެފައެވެ.
އިއްޔެގެ މަޝްވަރާތަކުގައި ދެ ގައުމުގެ ދެމެދުގައި އެކި ދާއިރާތަކުން އަލުން ގުޅުން ބަދަހިކުރުމާ ބެހޭ ގޮތުން މަޝްވަރާކުރެވުނެވެ. އަދި އީރާނުގެ ޗަބަހާރު ބަނދަރާއި ބެހޭ ގޮތުންވެސް ދެގައުމުން މަޝްވަރާކުރިއެވެ. އަފްޣާނިސްތާނަށް ގެންދާ މުދަލުގެ ވަރަށް ބޮޑުބައެއް އެގައުމަށް އެތެރެކުރަނީ ޗަބަހާރު ބަނދަރަށް މުދާ ގެނެސް، އެއްގަމު މަގުން އެތަކެތި ސަރަހައްދީ ރޮނގު ހުރަސްކޮށް އަފްޣާނިސްތާނަށް ވައްދައިގެންނެވެ.
ތާލިބާނުން ވަނީ އިންޑިއާގެ ސަލާމަތީ ކަންކަމަކީ އަފްޣާނިސްތާނުންވެސް ސަމާލުކަން ދޭނެ، އަދި އެކަމަށް އިންޑިއާއަށް ފުރިހަމަ އެއްބާރުލުން ދޭނެ ކަންކަން ކަމުގެ ޔަގީންކަން އިންޑިއާއަށް އަރުވާފައެވެ.
Advertisement
This content is created and paid for by advertisers and does not involve Voice Journalists
