މިއަހަރުގެ ފުރަތަމަ ކުއާޓަރުގެ ތެރޭގައި ސަރުކާރަށް ނުފެށުނު މަޝްރޫޢުއެެއް ދެން މިއަހަރުގެ ތެރޭގައި ފެށޭނެ ދުވަހެއް ނާންނާނޭކަމަށް އިދިކޮޅު އެންމެބޮޑު ޕާޓީ އެމްޑީޕީ ޕާލަމެންޓްރީ ގުރޫޕްގެ ލީޑަރ، ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވިދާޅުވެއްޖެއެވެ.

އެމްޑީޕީން މިރޭ ބޭއްވި ހަރުގެ ޖަލްސާގައި ވާހަކަދައްކަވަމުން ނާޒިލް ވިދާޅުވީ، މިހާރު ރާއްޖޭގެ ވެރިކަމުގައި މިއޮތް ސަރުކާރުން ރައްޔިތުންނަށް އަދި ޤައުމުގެ ތަރައްޤީއަށް ކޮށްދެވުނު ކަމެއް ނެތްކަމަށެވެ. އެގޮތުން މިދިޔަ އަހަރު ފާސްކުރި ބަޖެޓް ކަމެއް ނުކުރެވި އުޅެނިކޮށް ހުސްވިއިރު، ކުރެވުނުހާވެސް ކަމަކީ ސިޔާސީ މުއައްޒަފުންނަށް މުސާރަދިނުން އެކަނިކަމަށް ނާޒިލް ފާހަގަކުރެއްވިއެވެ.

އޭނާ ވިދާޅުވީ، ސަރުކާރަށް ކަމެއް ކުރެވޭނަމަ މިއަހަރުގެ ފުރަތަމަ ތިންމަސް ދުވަހުގެ ތެރޭގައި ކަންކަން ކުރަން ފަށާނޭ ކަމަށާއި، އެ މުއްދަތުގެ ތެރޭގައި ކުރަން ނުފެށޭ އައު މަސައްކަތެއް، މިއަހަރުގެ ކުރިއަށް އޮތްތަނުގައި ކުރެވޭނޭހަމަ އެއްވެސް ހަމައެއް ނޯންނާނޭ ކަމަށެވެ.

Advertisement

އޭނާ ވިދާޅުވީ އެމަގުން ކަންކަން ނުކުރެވިއްޖެނަމަ ދެން އެ އަހަރެއްގައި ހަމަ އެއްވެސް ކަމެއް ނުކުރެވޭނޭކަމަށެވެ. އަމަލީ މަސައްކަތް ނުކުރެވުނެއްކަމަކު ކުރެވޭނޭ މަސައްކަތްތައް ހުންނާނޭކަން ފާހަގަކުރައްވަމުން ނާޒިލް ވިދާޅުވީ، މިއަހަރު މި ސަރުކާރަށް ކަމެއް ކުރެވިދާނޭކަމަށް ޤަބޫލުނުކުރައްވާކަމަށެވެ. މިގޮތުން ޕްރޮޖެކްޓެއް ހިންގަން އޮތަސް އެކަމެއް ލިޔެވިފައި އޮތީ، ރައީސުލްޖުމްހޫރިއްޔާގެ އަތްޕުޅުގައި އޮންނަ ކުޑަ ކަރުދާސްކޮޅުޅެއްގައި އެކަނި ކަމަށެވެ. އެ ކަރުދާސްކޮޅު ގެއްލިއްޖެނަމަ ހެދޭނެ ގޮތެއް ނޯންނާނޭކަމަށާއި، އެހިސާބުން ޕްރޮޖެކްޓްތައްވެސް ގެއްލިގެން ދިޔައީކަމަށް ނާޒިލް ވިދާޅުވިއެވެ.

ނާޒިލް ވިދާޅުވީ 31 ޖެނުއަރީގައި އެމްޑީޕީން ބާއްވާ ބޮޑު އެއްވުމަށް ރައްޔިތުން ނިކުންނަން ޖެހޭކަމަށާއި، އެނޫންގޮތަކަށް މި ސަރުކާރު ޖަވާބުދާރީ ކުރުވެން ނެތްކަމަށެވެ. ސަރުކާރު ޖަވާބުދާރީ ކުރުވުމަށް އެމްޑީޕީން ކުރާ މިބާވަތުގެ ކަންކަމުގައި ރައްޔިތުންނަށް ކޮށްދެވޭނެ ކަމަކަށް އޮންނާނީ އެގޮތަށް ނިކުމެ ސަރުކާރަށް މަންޒަރު ދައްކައިގެންކަމަށް ނާޒިލް ވިދާޅުވިއެވެ.