ހުޅުމާލެ ދެވަނަ ފިޔަވަހީގައި ހުރި ސްޓެލްކޯގެ ޓްރާންސްފޯމަރުތަކަށް ގެއްލުންދީފިއެވެ.

ސްޓެލްކޯގެ މެނޭޖިން ޑިރެކްޓަރ ހުސައިން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ، މިކަމާއި ގުޅިގެން ހުޅުމާލެ ދެވަނަ ފިޔަވަހީގެ ކަރަންޓުގެ ވިއުގައަށް ބުރޫ އަރާފައިވާކަމަށާއި، މައްސަލަ ތަހުގީގުކުރުމަށް ހުށަހަޅާފައިވާކަމަށެވެ.

ފަހުމީ ވިދާޅުވީ، ބައުންޑަރީ ފާރުތަކާއި ތަޅުލެވިފައިވާ އެންކްލޯޝަރތަކުން ޓްރާންސްފޯމަރުތައް ރައްކާތެރިކުރެވިފައި ހުރި ނަމަވެސް މިކަން ކުރި ފަރާތްތަކުން ގޭޓުތައް ހުޅުވައި، ތަޅުތަކަށް ގެއްލުންދީ، އަދި ހައިވޯލްޓޭޖް ސިސްޓަމާއި ވެސް ކުޅެފައިވާކަމަށެވެ.

މިއީ ނުރައްކާތެރި ކަމެއްކަމަށާއި، މިކަމުގެ ސަބަބުން ކަރަންޓު ޖެހުމާއި، ބޮޑެތި އަނިޔާތަކާއި ކުރިމަތިލާން ޖެހިދާނެކަން ފާހަގަކުރައްވާ ފަހުމީ ވިދާޅުވީ، ހައިވޯލްޓޭޖް ސްވިޗްތައް ގަވާއިދުން ނައްޓާލާފައިވާ ގޮތުން މިކަމުގައި ތުހުމަތުވާ ފަރާތްތަކަކީ ޓްރާންސްފޯމަރ ސިސްޓަމްތަކާއި އޮޕަރޭޝަންތަކުގެ ޓެކްނިކަލް މަޢުލޫމާތު ލިބިފައިވާ ބައެއްކަން މިހާތަނަށް ބެލި ބެލުމުން ފާހަގަކުރެވިފައިވާކަމަށެވެ.

މިދިޔަ އަހަރުވެސް ޓްރާސްފޯމަރަށް ގެއްލުންދިނުމުގެ ތެރޭގައި ވަނީ ވަރަށް ހިތާމަވެރި ހާދިސާތަކެއް ހިނގާފައެވެ. މިގޮތުން ޓްރާންސްފޯމަރުތެރެއަށް ވަދެ އުޅެނިކޮށް މީހެއްގެ ފުރާނަ ގެއްލިފައިވާއިރު، ފަހުމީ ވިދާޅުވީ، ފޯމަރު ބަހައްޓާފައިހުންނަ ތަނުގެ ތެރެއަށް ވަނުމަކީ ވަރަށް ނުރައްކާތެރި ހާދިސާއެއް ދިމާވެދާނެ ކަމެއް ކަމަށެވެ.

އެހެންކަމުން މިފަދަ ކަންކަމުން ދުރުހެލިވުމަށް ހޭލުންތެރިކުރުމާއި މުހިންމު އަސާސީ ވަސީލަތްތަކުގެ ސަލާމަތްތެރިކަން ކަށަވަރުކުރުމަށް އަޅަންޖެހޭ ފިޔަވަޅުތައް އެޅުމަކީ މުހިންކަމެއްކަމަށް ފަހުމީ ވިދާޅުވިއެވެ.