ދައުރު ހަމަވަންދެން މި ވެރިކަން އޮންނަން ޖެހޭ ކަމަށް ޤަބޫލު ނުކުރައްވާ ކަމަށާ، މަޖިލިސް މެންބަރެއްގެ ގޮތުގައި ހުންނެވިއިރު މި ވެރިކަން ބަދަލުކުރަން ވަރަށް ބޮޑަށް މަސައްކަތް ކުރެއްވި ކަމަށް ރައްޔިތުންގެ މަޖިލީހުގެ މެދު ހެންވޭރު ދާއިރާގެ ކުރީގެ މެމްބަރު އަލީ އާޒިމް އިއުތިރާފްވެޑައިގެންފިއެވެ.
ދާދިފަހުން ވޮޝިންގޓަން ޕޯސްޓުގައި، ގެނެސްދިން ރިޕޯޓެއްގައި، ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ވެރިކަން ވައްޓާލުމަށް އިދިކޮޅު ފަރާތްތަކުން މަޖިލިސް ތެރެއިން މަސައްކަތް ކުރި ކަމަށް ބުނެފައިވެއެވެ. އަދި އެކަމަށްޓަކައި އިންޑިޔާގެ އެހީ ހޯދަން އިދިކޮޅު އެމްޑީޕީން މަސައްކަތް ކުރި ކަމަށްވެސް ބުނެފައިވެއެވެ.
ރާއްޖެޓީވީގެ ފަށާއިރު ޕްރޮގްރާމްގައި އެކަމާއި ގުޅިގެން ކުރެވުނު ސުވާލަކަށް ޖަވާބު ދެއްވަމުން ޢާޒިމް ވިދާޅުވީ، ރައީސް މުޢިއްޒުގެ ވެރިކަން ވައްޓާލުމަށް އޭނާ ވަރަށް ބޮޑަށް މަސައްކަތް ކުރެއްވި ކަމަށެވެ.
އަޅުގަނޑު ވަރަށް ބޮޑަށް ދެކެން. އެ މަސައްކަތުގަ މެދު ނުކެނޑި އުޅުނިން. އަޅުގަނޑަކީ މަޖިލިސް މެމްބަރެއް. މަޖިލިސް ތެރެއިން، އެ އުސޫލުގެ ތެރެއިން އޮންނަ ހަމަތަކުގެ ތެރެއިން ކުރެވެން އޮތް ކަމެއް ކަމަކީ. އެހެންވީމާ އެކަން ކުރަން އަޅުގަނޑު އުޅުނިން. މަސައްކަތްވެސް ކުރިން. އެ ދުވަހު އެކަން ކުރެވުނު ނަމަ އަޅުގަނޑު ޤަބޫލުކުރަނީ މިއަދު މި ދެކޭ ދަތި އުނދަނގޫތަކެއް ނުފެނުނީހޭ.
މަޖިލީހުގެ ކުރީގެ މެމްބަރު އަލީ އާޒިމް
މިއާއެކު އާޒިމް ވިދާޅުވީ، ދައުރު ނިމެންދެންވެސް ރައީސް މުޢިއްޒުގެ ވެރިކަން އޮންނަންޖެހޭ ކަމަށް ގަބޫލު ނުކުރައްވާ ކަމަށާ، އޮންނަ ހަމަތަކާއި އުސޫލު ތަކުގެ ތެރެއިން މި ވެރިކަން ބަދަލު ކުރުމަކީ ކުރަންޖެހޭ ކަމެއް ކަމަށެވެ.
ޢާޒިމް މިހެން ވިދާޅުވެފައިވާއިރު، ނިމިދިޔަ 19 ވަނަ މަޖިލީހުން ވަނީ، އެމްޑީޕީގެ މެންބަރުންގެ ވޯޓުން އެކަނިވެސް ރައީސް އާއި ނާއިބު ރައީސް މަގާމުން ވަކި ކުރެވޭގޮތަށް ގަވާއިދު އިސްލާހު ކޮށްފައެވެ.
އަދި، ރައީސް އާއި ނާއިބު ރައީސް މަގާމުން ވަކިކުރުމުގެ މަސައްކަތް އަވަސްކޮށް، ފަސޭހަ ކަމާއެކު ކިރެވޭގޮތަށް ގަވާއިދު ބަދަލުކުރުމަށް އިސްލާހު ހުށަހެޅުއްވީ ޢާޒިމްކަން ފާހަގަކޮށްލަންޖެހެއެވެ.
Advertisement
This content is created and paid for by advertisers and does not involve Voice Journalists
